Komuna e Çairit, e cila po udhëhiqet nga Visar Ganiu, i cili vjen nga radhët e Bashkimit Demokratik për Integrim, gjatë vitit 2021 ka shpenzuar mijëra euro nëpër restorante, shkruan InfoShqip.
Edhe pse komuna e Çairit ka pa fund probleme dhe në këtë komunë mungojnë kushtet elementare të jetesës për qytetarët, ku vlen të theksohet fakti se infrastruktura rrugore është komplet e shkatërruar dhe mund të thuhet se ka më shumë gropa se rrugë, nuk ka parqe dhe kopshte për fëmijë, ka dhjetëra e dhjetëra ndërtime pa leje, ku mund të thuhet që Çairi është një ‘geto’ urbane në mes të Shkupit dhe përtej të gjitha këtyre problematikave komuna e Çairit shpenzon mijëra euro nëpër restorante luksoze nga taksat e qytetarëve të saj.
Pas investigimit të bërë nga Redaksia e InfoShqip, vetëm gjatë vitit 2021, Komuna e Çairit ka shpenzuar plot 720.232 denarë nëpër restorante. Tek “Austrian Palas” që gjindet në Çarshi të Shkupit, vetëm gjatë vitit 2021 janë shpenzuar plot 254.380 denarë, tek “Fish Restorant” që ndodhet rreth rrjedhës të lumit Vardar janë shpenzuar 197.225 denarë, tek “Bushi Resort” që është nje restorant luksoz në Shkup janë shpenzuar 114.587 denarë, tek “Restorant Kalabrija” janë shpenzuar 89.610 denarë, ndërsa tek “Restorant Vodenica Mulino” në Shkup janë shpenzuar 64.430 denarë. Poashtu vlen të theksohet fakti se këta janë vetëm disa nga restorantet e gjetura në investigimin e InfoShqip, pasi mund të ketë edhe restorante tjera ku janë shpenzuar paratë nga llogaria e komunës së Çairit.
Në vazhdim mund ta shikoni me fakte se në cilat restorante i ka shpenzuar paratë komuna e Çairit, ku mund ta shihni emrin e restorantit, datën dhe shumën që është paguar. /InfoShqip.com
