Shërbimet sekrete ruse janë vënë në dijeni nga Shtetet e Bashkuara të Amerikës për përgatitje të mundshme të një sulmi terrorist në Moskë. FSB konfirmoi se informacioni i është përcjellë përmes kanaleve zyrtare të komunikimit.
Sipas agjencisë ruse të lajmeve RIA, Shërbimi Federal i Sigurisë ka nisur zbatimin e masave të nevojshme për t’iu përgjigjur kërcënimit dhe për të shmangur një sulm të mundshëm.
Të lidhura
None found
Paralajmërim të ngjashëm ka dhënë edhe Ambasada e SHBA-së në Moskë. Përfaqësia diplomatike amerikane deklaroi se ka të dhëna të besueshme mbi një kërcënim terrorist që mund të shkaktojë një numër të madh viktimash.
Sipas njoftimit të ambasadës, vendi që mund të jetë në shënjestër është Muzeu dhe Parku Natyror Tsaritsyno në Moskë.
Ambasada amerikane bëri të ditur se qeveria e SHBA-së po bashkëpunon me autoritetet ruse për menaxhimin e situatës. Ky koordinim tërheq vëmendje, pasi vjen në një periudhë marrëdhëniesh të tensionuara mes Uashingtonit dhe Moskës.
Autoritetet nuk kanë publikuar ende të dhëna për individët ose grupet që mund të fshihen pas kërcënimit, ndërsa në Rusi vijojnë masat e sigurisë.
