Në Kosovë do të dislokohen ushtarë të Regjimentit të 2-të të Kalorësisë dhe njësi mbështetëse të Divizionit të Parë të Këmbësorisë të ushtrisë së Shteteve të Bashkuara të Amerikës. Angazhimi i tyre do të jetë pjesë e KFOR-it, misionit të NATO-s.
Të lidhura
None found
Ushtria amerikane bëri të ditur se këto forca do të marrin detyrën nga ekipi luftarak i Brigadës së 53-të të Këmbësorisë të Gardës Kombëtare të Floridës. Rotacioni përfshin edhe zëvendësimin e Batalionit të Dytë të Regjimentit të 135-të të Aviacionit të Gardës Kombëtare të Kolorados nga elemente të Brigadës së Aviacionit Luftarak të Divizionit të Parë të Këmbësorisë.
Dislokimi i ri pason shqyrtimin që Shtabi Suprem i Forcave Aleate në Evropë (SHAPE) i ka bërë misionit të KFOR-it, për të optimizuar mënyrën e organizimit dhe praninë e forcave të NATO-s në Kosovë.
Njoftimi e lidh përshtatjen e strukturës së misionit me përmirësimin e situatës së sigurisë. Sipas tij, kjo mbështet një proces gradual, të udhëhequr nga zhvillimet në terren, në mënyrë që KFOR-i të ruajë gatishmërinë për të kryer detyrat e veta.
Në të njëjtën kohë, aleatëve evropianë do t’u takojë përgjegjësia parësore, në përputhje me kalimin drejt konceptit të NATO-s 3.0.
Për forcat amerikane, ky rotacion sjell një mënyrë tjetër angazhimi në Kosovë: njësitë e Gardës Kombëtare ua lënë vendin forcave nga strukturat ushtarake të teatrit të operacioneve. Mbështetja për KFOR-in, ndërkaq, do të vijojë pa ndërprerje.
Komandanti i ardhshëm i Komandës Rajonale-Lindje, koloneli Jabari M. Miller, shprehu gatishmërinë e Divizionit të Parë të Këmbësorisë dhe të Regjimentit të 2-të të Kalorësisë për të marrë përgjegjësinë e këtij misioni të rëndësishëm.
Miller tha se ushtarët e tij kanë përgatitjen, motivimin, disiplinën dhe trajnimin e nevojshëm, si dhe janë të gatshëm të bashkëpunojnë me aleatët dhe partnerët e NATO-s për ruajtjen e një mjedisi të sigurt e të qëndrueshëm në Kosovë.
Duke shprehur falënderime për shërbimin e Brigadës së 53-të të Këmbësorisë, ai konfirmoi sërish përkushtimin për vazhdimësinë e mbështetjes së Shteteve të Bashkuara ndaj KFOR-it.
Në prag të mbylljes së rotacionit të Brigadës së 53-të të Këmbësorisë, koloneli Samuel Sargent e përshkroi si nder për ushtarët amerikanë shërbimin në Kosovë përkrah aleatëve dhe partnerëve të NATO-s.
Sargent u shpreh se Brigada e 53-të e Këmbësorisë është krenare për përkushtimin dhe profesionalizmin e treguar nga trupat e saj gjatë misionit. Ai shfaqi gjithashtu bindjen se njësia pasuese do të çojë përpara forcimin e përpjekjeve të KFOR-it për një mjedis të sigurt dhe të qëndrueshëm për çdo komunitet.
Përkushtimi amerikan ndaj paqes dhe stabilitetit në Ballkanin Perëndimor u riafirmua nga Shtetet e Bashkuara, të cilat nënvizuan se bashkëpunimi i ngushtë me NATO-n dhe partnerët e tjerë do të vazhdojë përgjatë këtij tranzicioni.
Veprimtaria e KFOR-it vijon në përputhje me Rezolutën 1244 të Këshillit të Sigurimit të Kombeve të Bashkuara. Misioni ka për qëllim të ruajë një mjedis të sigurt dhe të garantojë lirinë e lëvizjes për të gjitha komunitetet në Kosovë.
