Ish-kreu i Shërbimit Federal Gjerman të Inteligjencës (BND), August Hanning, është arrestuar nga autoritetet gjermane, ndërsa ndaj tij po zhvillohet një hetim për spiunazh dhe rrjedhje të informacioneve sekrete shtetërore, raportoi gazeta “Bild”.
Hanning, i cili ishte në krye të BND-së nga viti 1998 deri në vitin 2005, dyshohet për spiunazh, tradhti të lartë dhe lidhje bashkëpunimi me një fuqi të huaj.
Të lidhura
None found
Hetuesit e Zyrës Federale të Policisë Kriminale (BKA) e ndaluan atë herët të martën, në banesën e tij në Nordwalde, pranë Münsterit.
Sipas “Bild”, ish-drejtuesi i shërbimit sekret dyshohet se ka blerë të dhëna të klasifikuara nga një ish-zyrtar i lartë i BND-së, me synimin për t’i rishitur përmes veprimtarisë së tij si konsulent.
Në Bavari, autoritetet arrestuan gjithashtu një tjetër ish-zyrtar të lartë të BND-së, Manfred D., i cili më parë kishte drejtuar zyrën e Hanning dhe kishte vijuar të shërbente deri në pranverën e vitit 2026.
Manfred D. pritet të dalë përpara Gjykatës Federale në Karlsruhe, ndërsa seanca e Hanning është planifikuar për të mërkurën.
Të dy ish-zyrtarët janë përfshirë në hetimet që lidhen me çështjen e biznesmenes gjermane Christina Block. Ajo po gjykohet së bashku me persona të tjerë për rrëmbimin e dhunshëm të dy fëmijëve të saj.
Gjatë kësaj procedure hetimore janë gjetur prova për nxjerrjen e të dhënave nga BND-ja. Informacionet në fjalë ishin përgatitur për një “informim zyrtar të inteligjencës” në Kancelarinë Gjermane.
Autoritetet po verifikojnë nëse Hanning ia ka dorëzuar drejtpërdrejt këto të dhëna një shteti të huaj.
Pas përfundimit të karrierës në shërbimin publik, Hanning u angazhua si këshilltar në fushën e sigurisë dhe të biznesit ndërkombëtar. “Bild” shkruan se ai kishte ruajtur kontakte me Rusinë dhe Kinën, përfshirë agjenci shtetërore të këtyre dy vendeve, si dhe dyshohet se dispononte kanale komunikimi pranë Kremlinit.
Gazeta raporton se Hanning prej vitesh përballej edhe me vështirësi të mëdha financiare, pasi një pjesë e pensionit të tij ishte sekuestruar.
Shkak për këtë dyshohet të ketë qenë anëtarësimi i tij në bordin mbikëqyrës të një banke në vendet baltike, e cila falimentoi pas veprimeve të një oligarku.
Përgjegjësia u kërkua edhe nga anëtarët e bordit mbikëqyrës, mes të cilëve Hanning, si dhe ish-sekretari i përgjithshëm i NATO-s dhe ish-kryeministri danez Anders Fogh Rasmussen.
Ende nuk është e qartë nëse problemet financiare të Hanning lidhen me marrëveshjet e dyshuara për shitjen e sekreteve shtetërore. Në shtator të vitit 2025, Gjykata e Hamburgut kontrolloi pronën e tij në Westerwald dhe zyrat ku ai ushtronte aktivitetin.
Zyrtarisht, në atë moment hetimi lidhej vetëm me çështjen e Christina Block. Megjithatë, dyshime kishte ngjallur vendosja e një hetuesi të fshehtë në një kompani të lidhur me Hanning.
Sipas “Bild”, ky zhvillim mund të nënkuptojë se hetimi për një tradhti të mundshme të lartë kishte nisur që atëherë.
Para se të merrte drejtimin e BND-së, August Hanning kishte shërbyer në Përfaqësinë e Përhershme të Gjermanisë Perëndimore në Berlinin Lindor. Ai qëndroi në krye të shërbimit nga viti 1998 deri në nëntor 2005.
Më pas, Hanning u emërua në një detyrë të lartë në Ministrinë e Brendshme të Gjermanisë, ku pati përgjegjësinë për mbikëqyrjen e shërbimeve të sigurisë gjatë periudhës kur Wolfgang Schäuble ishte ministër.
