Gjatë një bisede në emisionin “Goca dhe Gra” për divorcin dhe paragjykimet ndaj grave të divorcuara, Selin Bollati ndau me publikun një përvojë personale që lidhej me familjen e saj.
Të lidhura
None found
Ajo rrëfeu se pas pjesëmarrjes në “Big Brother” mes prindërve të saj kishte nisur një përplasje e fortë, e cila, sipas Selinës, u shndërrua në një krisje shumë serioze.
“Unë e kam përjetuar vetë. Një vendim që mora për të hyrë në ‘Big Brother’ u mbështet nga njëri prind, ndërsa tjetri nuk ishte dakord. Askush nuk erdhi të më pyeste se përse e kisha marrë atë vendim me miratimin e njërës palë dhe kundërshtimin e tjetrës. Megjithatë, kjo përfundoi në një konflikt të brendshëm mes tyre”, tregoi Selin Bollati.
Ori Nebijaj e pyeti nëse e kishte fjalën pikërisht për eksperiencën në “Big Brother”.
“Po, për rastin e ‘Big Brother’-it. Vendimin e mora pasi mora konfirmimin e të dy prindërve. Por pas përfundimit, për njërin prej tyre ajo eksperiencë nuk u përqafua, ndërsa për tjetrin ishte një mënyrë që unë të sfidoja veten. Ai më dha lirinë ta çoja deri në fund”, shpjegoi ajo.
Sipas Selinës, tensionet nuk u mbyllën me përfundimin e formatit televiziv. Përkundrazi, problemet vazhduan edhe pas daljes së saj dhe ajo e konsideronte veten pjesë të rëndësishme të situatës së krijuar mes prindërve.
“Pasi eksperienca përfundoi, krisja vazhdoi dhe shkaku isha unë. Në një moment, prindërit e mi po kalonin një krizë shumë të rëndë në marrëdhënien e tyre dhe unë isha faktori që e kishte nxitur. Në kohën kur situata ishte më e tensionuar, këtë e kam diskutuar shpesh edhe me miqtë e mi”, u shpreh Bollati.
Kjo periudhë e bëri atë të mendonte për ndarjen dhe për ndikimin që mund të ketë një fëmijë në raportin mes dy prindërve.
“Në një moment u ndala dhe mendova se edhe divorci mund të shihet nga një këndvështrim tjetër. Ndonjëherë fëmija mund të bëhet faktori që i çon prindërit drejt ndarjes, por, duke u bazuar te rasti im, ai mund të jetë gjithashtu forca që i bashkon sërish”, tha Selina.
Orinda Huta e pyeti se cila ishte gjendja aktuale e familjes së saj.
“Sot prindërit e mi janë bashkë. E kam treguar edhe më herët këtë histori për publikun. Kjo ndodhi pas negociatave që bëra unë, sepse kuptova se problemi isha vetë dhe vendosa të ndërhyja”, deklaroi ajo.
Kur u pyet nëse kjo përgjegjësi e kishte rënduar, Selin Bollati u përgjigj: “Është një përgjegjësi, sepse nuk ka fëmijë që dëshiron të shohë keq njërin prind apo tjetrin.”
