Bashkia e Tiranës ka miratuar vendimin për t’i shpallur Hashim Thaçin, Kadri Veselin, Jakup Krasniqin dhe Rexhep Selimin “Qytetarë Nderi” të kryeqytetit shqiptar.
Të lidhura
None found
Nisma u bë publike nga kryebashkiaku Erion Veliaj, disa ditë pas vendimit të Dhomave të Specializuara në Hagë për dënimin e katër ish-krerëve të UÇK-së. Veliaj njoftoi se do t’ia paraqiste propozimin Këshillit Bashkiak të Tiranës dhe u kërkoi edhe bashkive të tjera shqiptare të ndërmerrnin hapa të ngjashëm.
Propozimi u hodh për votim dhe mori miratimin e Këshillit Bashkiak të Tiranës, duke u shndërruar në vendim zyrtar të bashkisë.
“Nga sot, me propozim të Kryebashkiakut Erion Veliaj, Hashim Thaçi, Kadri Veseli, Jakup Krasniqi dhe Rexhep Selimi shpallen ‘Qytetarë Nderi’ të Tiranës. Një vendim i miratuar unanimisht nga Këshilli Bashkiak i Tiranës, në nderim të kontributit dhe rolit të tyre në historinë e Kosovës dhe në luftën e UÇK”, thuhet në njoftimin e Bashkisë së Tiranës.
Sipas bashkisë, ky vlerësim përbën një shenjë mirënjohjeje për kontributin historik të ish-krerëve të UÇK-së në rrugën e Kosovës drejt lirisë dhe shtetësisë.
