Federata e Futbollit të Kosovës ka ndarë një video speciale që pasqyron momentet më të spikatura të triumfit 1:0 ndaj Irlandës, nga përgatitjet para ndeshjes e deri te festimet pas suksesit të parë të “Dardanëve” në edicionin e ri të Ligës së Kombeve.
Të lidhura
None found
Materiali filmik hapet me mbërritjen e Kombëtares së Kosovës në stadium, pak para përballjes me irlandezët. Më pas, kamera kalon në ambientet e zhveshtores, ku spikat edhe një moment i veçantë me Erblin Osmanin.
Osmani, 17-vjeçari i grumbulluar për herë të parë me Kombëtaren A, iu drejtua shkurt bashkëlojtarëve. Ai falënderoi për ftesën në përfaqësuesen e Kosovës dhe i uroi ekipit rezultat pozitiv në këtë sfidë.
Videoja përcjell gjithashtu tensionin dhe emocionet e lojtarëve gjatë takimit, ndërsa episodi vendimtar ndodhi në minutat e fundit, kur Vedat Muriqi shënoi golin që i dha fitoren Kosovës.
Pas realizimit, futbollistët shpërthyen në festë, e cila vijoi edhe pas përfundimit zyrtar të ndeshjes.
Pamjet mbyllen në zhveshtore, ku “Dardanët” festojnë së bashku fitoren e rëndësishme dhe tri pikët e para të Kosovës në Ligën e Kombeve.//
