Kryeministri Hristijan Mickoski ishte dje një nga folësit në Samitin prestigjioz të Concordia-s në New York, aktivitet që zhvillohet në të njëjtën kohë me Asamblenë e Përgjithshme të Kombeve të Bashkuara.
Të lidhura
None found
Gjatë panelit ku mori pjesë së bashku me zëvendëskryeministren e Gjeorgjisë, Maka Botchorishvili, ai foli për vështirësitë që shoqërojnë rrugën e integrimit evropian. Mickoski akuzoi disa vende anëtare të BE-së se po e shfrytëzojnë këtë proces për të prekur identitetin maqedonas, ndërsa theksoi se nga Brukseli po vijnë edhe sinjale pozitive.
Sipas tij, Maqedonia e ka nisur rrugëtimin drejt Bashkimit Evropian pothuajse dy dekada e gjysmë më parë, por për shkak të arsyeve artificiale ende nuk është bërë pjesë e unionit. Ai tha se shpreson që një ditë vendi të arrijë këtë moment historik, por ndërkohë pakënaqësia e qytetarëve mbetet e madhe.
Mickoski theksoi se gjatë viteve të shkuara janë bërë shumë lëshime, përfshirë ndryshimin e flamurit, ndryshimet e përsëritura të Kushtetutës dhe ndryshimin e emrit kushtetues. Sipas tij, të gjitha këto krijojnë ndjesinë e një historie pa fund. Megjithatë, ai tha se vendi vazhdon të besojë te vlerat evropiane dhe do të përpiqet të gjejë një zgjidhje për bllokadën aktuale, duke nënvizuar se nuk mjafton vetëm pritja, por duhet edhe veprim.
Sa u përket negociatave me BE-në, kryeministri tha se ato duhet të shërbejnë për transformimin e institucioneve dhe jo për ndryshimin e identitetit.
“Ne po ndërtojmë dhe po përparojmë. Për brezin tim, negociatat me BE-në kanë qenë një mënyrë për të reformuar institucionet, jo për të prekur identitetin. Për fat të keq, disa vende anëtare po përpiqen të zgjidhin çështje dypalëshe në një mënyrë që synon ndryshimin e identitetit tonë, në vend të reformimit të institucioneve”, deklaroi Mickoski.
Ai e përshkroi situatën si një formë presioni, ku vendit i thuhet se duhet të zgjedhë mes të qenit brenda ose jashtë dhe se, nëse dëshiron të jetë pjesë e BE-së, duhet të pranojë kërkesat që i bëhen. Megjithatë, Mickoski tha se kjo mbetet alternativa e vetme për vendin dhe se Maqedonia është e gatshme të ecë përpara për të dalë nga kjo situatë./Telegrafi/
