Presidenti ukrainas Volodymyr Zelensky njoftoi se Ukraina ka përdorur për herë të parë raketën balistike “Pelican” (FP-7), gjatë një sulmi të gjerë të kryer gjatë natës në rajonin e Moskës.
Të lidhura
None found
Sipas deklaratës së Zelenskyt, forcat ukrainase shënjestruan një “objekt të madh të industrisë ruse të naftës”, si edhe një strukturë logjistike në të njëjtin rajon.
Operacioni u zhvillua nga njësitë ukrainase të mbrojtjes dhe inteligjencës, me objektiv infrastrukturën kryesore të industrisë ruse të naftës dhe hallkat e zinxhirit logjistik.
Gjatë aksionit u përdorën 10 kategori të ndryshme armësh, ku pjesa më e madhe e tyre, sipas presidentit ukrainas, janë projektuar dhe prodhuar në Ukrainë. Në mesin e tyre ishte edhe “Pelican” (FP-7), e angazhuar për herë të parë në një operacion të tillë.
Një nga objektivat e goditur ishte rafineria e naftës e Gazprom Neft, e vendosur në zonën e Kapotnyas në Moskë.
Autoritetet ukrainase pretendojnë se kjo rafineri mbulon rreth 40% të nevojave për karburant të Moskës dhe të zonave përreth.
Përveç dëmeve në objektet e synuara, sulmi preku edhe një ndërtesë banimi. Autoritetet ruse raportuan viktima dhe të plagosur, ndërsa guvernatori i rajonit bëri të ditur se dy persona humbën jetën dhe 20 të tjerë u plagosën.
