Qeveria britanike ka njoftuar masa të forta kundër kolonëve izraelitë në Bregun Perëndimor, përfshirë ndalimin e importit të produkteve të prodhuara në këto zona.
Të lidhura
None found
Duke folur në Dhomën e Ulët të Parlamentit, ministri i Jashtëm britanik Ed Miliband deklaroi se Londra i sheh vendbanimet izraelite në territorin palestinez si të paligjshme sipas së drejtës ndërkombëtare. Ai sqaroi se masat nuk do të prekin vetëm tregtinë, pasi sanksione do të vendosen edhe ndaj personave dhe entiteteve që financojnë apo mbështesin ngritjen e vendbanimeve të reja. Ndalimi i importeve pritet të zbatohet brenda gjashtë deri në nëntë muajve.
“Qeveria jonë i ka peshuar kostot e marrjes së këtyre masave, por ne nuk mund të qëndrojmë mënjanë thjesht sepse kemi frikë nga reagimi izraelit. Shumë njerëz në Britani janë prekur thellësisht nga vuajtjet e popullit palestinez dhe kërkojnë që ekzekutivi të reagojë ndaj asaj që po ndodh”, tha Ed Miliband, ministër i Jashtëm i Britanisë së Madhe.
Sipas Miliband, dëshmitë e mbledhura nga terreni tregojnë se palestinezët në Bregun Perëndimor po “frikësohen, ngacmohen dhe kërcënohen për t’u larguar nga shtëpitë e tyre nga këta kolonë terroristë”. Ai shprehu shqetësimin se qeveria izraelite po “mbyll sytë” ndaj zhvendosjes së detyruar të palestinezëve. Shefi i diplomacisë britanike theksoi se kjo situatë duhet denoncuar publikisht dhe se Londra nuk mund të qëndronte “e heshtur apo pasive”.
Presidenti izraelit Isaac Herzog e dënoi vendimin e Britanisë së Madhe, duke e cilësuar si një “gabim të rëndë vlerësimi”. Ai akuzoi gjithashtu Londrën për përfshirje në politikën e brendshme të Izraelit, në një periudhë kur vendi po i afrohet zgjedhjeve të ardhshme.
Ministri i Jashtëm izraelit, Gideon Saar, bëri të ditur se Izraeli do të mbyllë konsullatën britanike në Jerusalem. Përveç kësaj, autoritetet izraelite kanë ndaluar hyrjen në vend për 12 politikanë dhe aktivistë britanikë, mes të cilëve edhe ish-kreu i Partisë Laburiste, Jeremy Corbyn.
