Një shpërthim i fuqishëm në një bazë ushtarake në Bolivi u ka marrë jetën shtatë personave, ndërsa shtatë të tjerë vijojnë të jenë të zhdukur.
Të lidhura
None found
Incidenti tragjik u regjistrua të premten, më 4 shtator, rreth orës 14:30 me kohën lokale, në një kazermë në Viacha, afërsisht 30 kilometra nga kryeqyteti La Paz.
Shpërthimi përfshiu një zonë të bazës që shërbente për ruajtjen e materialeve piroteknike.
Komandanti i Ushtrisë boliviane, Hector Alarcón, konfirmoi numrin e viktimave dhe njoftoi se ekipet e emergjencës po vazhdojnë operacionet për gjetjen e personave që rezultojnë të zhdukur.
Gjatë një konference për mediat, Alarcón theksoi se përparësi mbetet lokalizimi i ushtarakëve të zhdukur dhe informimi sa më i shpejtë i familjeve të tyre.
Shkaku i saktë i shpërthimit nuk është konfirmuar ende. Presidenti bolivian, Rodrigo Paz Pereira, deklaroi se hetuesit po shqyrtojnë si një nga pistat kryesore mundësinë e manipulimit të papërshtatshëm të lëndëve shpërthyese që ruheshin në objekt.
Autoritetet kanë hapur një hetim për të zbardhur plotësisht rrethanat e ngjarjes dhe për të verifikuar nëse protokollet e sigurisë janë zbatuar siç duhet.
Ministrja e Shëndetësisë, Marcela Flores, njoftoi se pas incidentit janë marrë në trajtim gjithsej 84 persona. Prej tyre, 31 vazhdojnë të qëndrojnë të shtruar në spitale.
Pas tragjedisë, presidenti Paz Pereira shpalli zi kombëtare dhe urdhëroi që të rishikohen protokollet e sigurisë brenda Forcave të Armatosura.
Kreu i shtetit kërkoi gjithashtu nga autoritetet dhe forcat politike që ngjarja të mos përdoret për qëllime politike, ndërkohë që vijojnë hetimet për sqarimin e plotë të saj.
