Rreth 30 robotë u mblodhën para Ministrisë Polake të Politikave Dixhitale, duke kërkuar që përdorimi i inteligjencës artificiale në tregun e punës të kontrollohet. Të pajisur me flamuj dhe të shoqëruar nga slogane proteste, ata u shfaqën si aktivistë të pazakontë.
Të lidhura
None found
Nëpër altoparlantë dëgjoheshin thirrjet “Le të mbrojmë vendet e punës”, “Është koha për të vendosur rregulla” dhe “Mos prisni, rregulloni”. Në trotuar lëviznin lloje të ndryshme robotësh, nga modelet humanoide me dy këmbë deri te pajisjet me katër këmbë, të ngjashme me qentë.
“Robotët janë këtu për të treguar se kjo teknologji është tashmë një realitet”, deklaroi për AFP Agibot A3, një prej robotëve humanoidë që morën pjesë në aktivitet.
Nisma u organizua nga Democratism, një grupim që synon të hapë diskutimin mbi “pasojat sociale dhe ekonomike të automatizimit” të nxitur nga inteligjenca artificiale.
Sipas organizatorit Gregorj Kulis, debati duhet të përfshijë edhe mundësinë që njerëzit të zëvendësohen nga robotët humanoidë dhe IA-ja në profesionet intelektuale.
“Nëse një robot i tillë është disa herë më efikas dhe më i lirë, pak menaxherë biznesi do të thonë: ‘Do të vazhdoj të punësoj njerëz’”, tha Kulis për AFP.
Kulis është aktualisht drejtor i një kompanie robotike IT. Ai deklaron gjithashtu se mban postin e presidentit dhe CEO-s së një agjencie punësimi, ndërsa më herët ka qenë anëtar i Këshillit të Tregut të Punës të Ministrisë së Familjes, Punës dhe Politikës Sociale.
Ai u shpreh se është “i tmerruar” nga ndryshimet teknologjike që mund të tronditin mënyrën se si shoqëria e organizon punën.
Gjatë protestës, robotët u vizituan nga ministri i Politikës së Qeverisjes Dixhitale, Krzysztof Gawkowski.
“Modelet e pakontrolluara të IA-së, të ngulitura në humanoide që do të vazhdojnë të evoluojnë sipas tyre ndërsa robotika përparon, janë një problem i madh”, deklaroi ai.
Në korrik, presidenti nacionalist konservator i Polonisë, Karol Nawrotski, firmosi një dokument qeveritar për zbatimin e rregullores evropiane mbi inteligjencën artificiale, të njohur si Akti i IA-së.
Rregullorja parashikon krijimin e një autoriteti kombëtar që do të jetë përgjegjës për zbatimin e rregullave evropiane ekzistuese, të cilat tashmë kanë hyrë zyrtarisht në fuqi.
