Ziqiri Mero, 100 vjeç, u ngjit sot në skenën e Pallatit të Kongreseve, si delegati më i moshuar i Kongresit, por u prezantua edhe si socialisti më i ri.
Kryeministri dhe kryetari i kësaj partie, Edi Rama i detyroi që të gjithë të ngriheshin në këmbë dhe të duartokisnin. Rama i befasuar, e prezantoi Meron si socialistin me të ri dhe zbuloi se ai ishte plot 100 vjeç.
Me bindje të majta dhe veteran lufte Ziqiri Mero mes socialistëve të tjerë u entuziazmua dhe uroi suksese për forcën politike që ai mbështet.
Por kush është Zeqir Mero, veterani 100-vjeçar që Rama e puthi në ballë?
Sipas disa dokumenteve të publikuara nga historiani Dashnor Kaloçi, por dhe shkrimeve që gjenden në arkivën e mediave, Mero rezulton të ketë qenë ushtarak i lartë gjatë kohës së regjimit komunist.
Në vitin 1945 Mero ka zbatuar një radiogram urgjent të firmosur nga Enver Hoxha, me cilësinë e Komandantit të Përgjithshëm të Ushtrisë Nacional Çlirimtare. Ky readiogram aprovonte dënimin me vdekje të gjashtë personave, gjykuar nga një Këshill Gjyqësor Ushtarak i Divizionit të III-të, të Korparmatës se Dytë, të kryesuar nga Kryetari, Irakli Bozo (major) dhe prokuror, Ziqiri Mero, kapiten i parë.
Por emri i Meros del dhe në kujtimet e Ylli Polovinës i cili, në një shkrim të tij ndër të tjera shprehet: Kur prokurori Zeqiri Mero do të jepte pretencën tha papritur se i dhembte koka dhe se gjyqi duhej të shtyhej për të nesërmen në mëngjes. Kështu të akuzuarit i çuan në birucë dhe kur sapo u hap dita e re i lidhën sërish me pranga dhe me litar.
Historia e Meros nuk mbaron këtu pasi ai ka marrë një dekoratë nga Rusia në vitin 2015, me motivacionin se ka qenë i angazhuar në formacionet partizane, në zona të ndryshme të vendit, duke luftuar kundër pushtuesve fashistë.
Në nder të tij gjithashtu një rrugë në Korçë mban emrin e tij.
