Tre punonjës së policisë të Sarandës akuzohen për “shpërdorim detyre” nga Shërbimi i Çështjeve të Brendshme dhe Ankesave në Policinë e Shtetit, pasi kanë vërejtur shkelje në çështjen e abuzimit të një 17 vjeçareje në qytetin bregdetar.
“Shërbimi për Çështjet e Brendshme dhe Ankesat (SHÇBA) pas transmetimit në TV të një emisioni, ku ka dyshime për abuzim me një minorene nga disa persona, menjëherë filloi hetimet duke konkluduar në referimin e materialeve procedurale në Prokurorinë Pranë Gjykatës së Shkallës së Parë Sarandë, për veprën penale “Shpërdorimi i detyrës, në ngarkim të punonjësve të 3 punonjësve të policisë”, thuhet në njoftimin e SHÇBA.
SHÇBA ka referuar në Prokurori, materialet për:
– Komisar S.B., Shef i Seksionit të Policimit në Komunitet në Komisariatin e Policisë Sarandë;
– N/Komisar R.I., Specialist për Dhunën në Familje dhe të Miturit, në Komisariatin e Policisë Sarandë;
– Inspektor B.N., SPZ në Komisariatin e Policisë Sarandë.
Vajza 17-vjeçare, ndërkohë ndodhet në Tiranë në një qendër rehabilitimi nën kujdesin e specialistëve dhe psikologëve.
