Ish-mesfushori brazilian Oscar dos Santos Emboaba Junior, që pak muaj më parë i dha lamtumirën futbollit të luajtur, ka befasuar opinionin publik në Brazil dhe mbarë botën me një deklaratë të pazakontë financiare.
Ai tregoi se gjatë gjithë periudhës që luajti në Kinë, nuk shpenzoi asgjë nga shuma marramendëse prej 205 milionë eurosh që grumbulloi nga paga e tij.
Të lidhura
None found
Transferimi i Oscar në Kinë ndodhi rreth një dekadë më parë, në kohën kur futbolli kinez po përjetonte një bum të vërtetë zgjerimi. Atëbotë, Shanghai SIPG pagoi 60 milionë euro për ta shkëputur nga Chelsea.
Pasi firmosi një kontratë jashtëzakonisht fitimprurëse me klubin e Shangait, ai ka habitur të gjithë duke pohuar se e gjithë pasuria e fituar atje qëndron ende e paprekur në një llogari bankare të dedikuar.
“Të gjitha të ardhurat nga paga i kalova në një llogari më vete dhe asnjëherë nuk i kam përdorur. Jeta ime dhe e familjes mbulohej tërësisht nga shpërblimet e ndeshjeve, të cilat ishin gjithashtu shumë bujare”, rrëfeu Oscar gjatë një interviste në podkastin The Obi One.
Gjatë aventurës së tij kineze, ai la gjurmë të thella, duke regjistruar gjithsej 77 gola dhe 142 asistime në 248 paraqitje me fanellën e Shangait. Në vitrinën e tij atje përfshihen tre tituj kampionë të Superligës Kineze dhe një Kupë e Kinës.
Pas largimit nga Kina në vitin 2024, Oscar u kthye te klubi ku u formua si fëmijë, Sao Paulo, ndërsa karrierën e tij si futbollist profesionist e mbylli përfundimisht në muajin prill, në moshën 34-vjeçare.
