Barcelona ka hapur fazën e parë të shitjes së biletave për duelin e 25 tetorit kundër Real Madridit. Gjatë 48 orëve të para, të drejtën për të blerë ekskluzivisht e kanë pasur anëtarët e klubit.
Të lidhura
None found
Për vendet standarde, çmimet luhaten nga 476 deri në 999 euro. Në kategorinë e rregullt, biletat me vlerën më të lartë gjenden në Tribuna 2 Inferior dhe Tribuna 1.
Gjithashtu, klubi katalanas ofron paketa premium, të cilat kushtojnë nga 2 mijë e 50 euro deri në 5 mijë e 500 euro.
Ndeshja e sezonit të kaluar në “Spotify Camp Nou” i siguroi Barcelonës të ardhura rekord prej 16.4 milionë eurosh vetëm nga dita e përballjes. Ndërkohë, ndeshja e mëparshme kishte sjellë 13.8 milionë euro, ndërsa bileta mesatare kushtonte 554 euro.
Duke marrë parasysh tarifat aktuale, dukshëm më të larta, si dhe numrin më të madh të vendeve VIP të ofruara, Barcelona pritet të përfitojë sërish të ardhura të konsiderueshme nga përballja e tetorit.
Tarifat nuk janë përfundimtare, pasi çmimet e biletave ndryshojnë në bazë të ofertës dhe kërkesës.
