Shakira ka fituar një çështje të rëndësishme gjyqësore në Madrid, pasi një gjykatë spanjolle ka urdhëruar autoritetet tatimore t’i kthejnë më shumë se 55 milionë euro që i ishin mbledhur në mënyrë të padrejtë në lidhje me taksat e vitit 2011. Vendimi u dha nga Audienca Kombëtare dhe është bërë publik së fundmi, duke i dhënë fund një prej përplasjeve më të gjata mes artistes dhe administratës tatimore spanjolle.
Sipas gjykatës, nuk është provuar se Shakira ka qëndruar më shumë se 183 ditë në Spanjë gjatë vitit 2011, që është kufiri ligjor për t’u konsideruar rezidente tatimore në vend. Trupi gjykues konstatoi se këngëtarja ka kaluar rreth 163 ditë në territorin spanjoll dhe se autoritetet nuk arritën të dëshmojnë se ajo kishte qendrën e interesave të saj ekonomike në Spanjë gjatë asaj periudhe.
Të lidhura
None found
Si pasojë, gjykata urdhëroi që shteti spanjoll t’i kthejë artistes të gjithë shumën e paguar, përfshirë rreth 24 milionë euro taksa mbi të ardhurat dhe afro 25 milionë euro gjoba të vendosura për shkelje të supozuara “shumë serioze”, si dhe interesat përkatëse ligjore. Në total, rimbursimi kalon vlerën e 55 milionë eurove.
Vendimi vjen në një moment kur Shakira po përmbyll turneun e saj botëror “Women Don’t Cry Anymore” dhe po përgatitet për një seri koncertesh në Madrid. Çështja e saj me autoritetet tatimore spanjolle ka qenë e gjatë dhe e përsëritur, duke përfshirë edhe hetime dhe marrëveshje të mëparshme ligjore në vite të ndryshme.
