Presidenti ukrainas Volodymyr Zelensky, i dërgoi një letër Presidentit Donald Trump, duke thënë se vendi i tij është i gatshëm të “vijë në tryezën e bisedimeve sa më shpejt të jetë e mundur për të sjellë paqen e qëndrueshme më afër”, tha presidenti amerikan të martën.
Gjatë fjalimit në një sesion të përbashkët të Kongresit, Trump tha se mori letrën nga Zelensky më herët gjatë ditës.
“Ekipi im dhe unë jemi të gatshëm të punojmë nën udhëheqjen e fortë të Presidentit Trump për të arritur një paqe që zgjat”, u shpreh Trump se tha Zelensky në letër.
“Ne vërtetë vlerësojmë se sa shumë ka bërë Amerika për të ndihmuar Ukrainën të ruajë sovranitetin dhe pavarësinë e saj. Lidhur me marrëveshjen për mineralet dhe sigurinë, Ukraina është e gatshme ta nënshkruajë atë në çdo kohë që është e përshtatshme për ju”, ka shkruar Zelensky.
Trump dhe Zelensky ishin vendosur të nënshkruanin një marrëveshje për mineralet në Shtëpinë e Bardhë të premten, derisa liderit ukrainas iu tha të largohej pas një takimi të nxehtë.
Presidenti tha se ishte mirënjohës për letrën, duke shtuar se “njëkohësisht, ne kemi pasur diskutime serioze me Rusinë dhe kemi marrë sinjale të forta se ata janë gati për paqe”.
