Policia ka kërkuar mbështetje shtesë pas raportimit për të shtëna me armë zjarri në zonën “Hamalla e Dedës”, pranë fshatit Qafë T’Mugu, në Qelëz të Pukës.
Sipas informacioneve paraprake, një grup efektivësh po monitoronte një parcelë të dyshuar për kultivim kanabisi, e pozicionuar në një terren të thellë malor. Dyshohet se personat që mund të jenë të përfshirë në kultivimin e lëndëve narkotike kanë dalluar punonjësit e Policisë, pas së cilës janë dëgjuar të shtënat.
Të lidhura
None found
Pas situatës së krijuar, forcat në terren kanë kërkuar përforcime. Në zonë janë nisur efektivë të tjerë, ndërsa për mbështetje është angazhuar edhe një grup i FNSH-së nga Shkodra.
Deri tani nuk ka një njoftim zyrtar për persona të plagosur ose të arrestuar në lidhje me ngjarjen. Kontrollet dhe operacioni policor vijojnë në terrenin malor.
Po në këtë zonë, tre ditë më parë, Policia arrestoi një shtetas, i dyshuar për kultivim të lëndëve narkotike dhe armëmbajtje pa leje.
Ngjarja mbetet në zhvillim, ndërsa priten të dhëna të mëtejshme nga Policia për rrethanat e të shtënave dhe personat që mund të kenë qëlluar.
