Shembja e pabesë e Teatrit, Meta me premtime: Krim që nuk do të amnistohet

Në Ditën Botërore të Teatrit, Presidenti Ilir Meta ka kujtuar shembjen e pabesë të Teatrit Kombëtar më 17 maj të 2020.

Përmes një postimi në rrjetet sociale, Meta zotohet se shembja e teatrit nuk do  të amnistohet dhe se përgjegjesit do të përballen me drejtësinë.

Sipas Metës, pas 25 prillit Teatri Kombëtar do të ndërtohet aty ku ishte, ashtu siç ishte.

Postimi i Metës

Sot, me rastin e Ditës Botërore të Teatrit, zotohem se krimi i ndodhur në zemër të Tiranës më 17 maj 2020, mes errësirës dhe në periudhë pandemie, nuk do të amnistohet kurrë dhe se mbi rrënojat e Teatrit Kombëtar, do të rivendoset njëherë e përgjithmonë Drejtësia, që do të shembë Tiraninë.

Mirënjohje të gjithë artistëve dhe qytetarëve, të cilët për mbi dy vjet, me sakrifica dhe nën presione të pashembullta, i dhanë zë kauzës së Teatrit dhe zgjuan ndërgjegjen shoqërore e kombëtare.

Pas 25 prillit, Teatri Kombëtar do ndërtohet aty ku ishte dhe ashtu siç ishte! KOHA PËR DREJTËSI PO AFRON!


Shtuar 27.03.2021 12:38