Rrjetet sociale si Instagram dhe Tik Tok janë kthyer në “kohën” e preferuar të të rinjve shqiptar, të cilët disa bëjnë biznes e disa krijojnë sherre deri në tragjedi.
Rasti i djeshëm i të riut Kozak Braci, i cili u mor peng nga disa persona pas sharjeve në rrjetet sociale,ka bërë bujë të madhe dhe vazhdon të bëjë si një këmbanë alarmi edhe për policinë e Shtetit.
Kozak Braci, i njohur “si mbreti i Instagramit”njihet për sherret online me figura të njohura të ekranit dhe personazhe problematike të botës së krimit.
Por sherri me Fabio Dushkun, një person shumë i famshëm në burgun grek, i ka kushtuar atij shumë.
Fillimisht Braçi u sulmua me një lëndë shpërthyese kapsoll, në hyrje të banesës së tij, pastaj u mor peng nga miqtë e ngushtë të Dushkut.
NJOFTIMI I POLICISË MBI SHPËRTHIMIN:
Më datë 05.09.2021, rreth orës 06:56, në sallën operative të DVP Tiranë ka telefonuar shtetasi K. B., i cili deklaron se rreth orës 03:00, ka dëgjuar një zhurmë në sheshpushim e pallatit në rrugën “Njazi Meka”Nga veprimet paraprake të kryera nga grupi hetimor dyshohet se zhurma ka ardhur si pasojë e plasjes së një kapsolle me lëndë piroteknike e konfirmuar dhe nga eksperti anti-eksploziv), pa shkaktuar asnjë dëm material.Vijojnë veprimet e metejshme për sqarimin e plotë të ngjarjes.
Nuk dihet nëse mes ngjarjeve ka një lidhje, por Braçi ka sulmuar ashpër Dushkun pas këtij sulmi, duke kaluar edhe në ofendime të rënda.
Pengmarrja e tij zgjati vetëm pak orë pasi të rinjtë e dëtyruan atë nëpërmjet dhunës fizike të kërkojë falje në llogarinë e tij personale për të gjithë ofendimet e bëra në adresë të Dushkut.
Kush është Fabio Dushku:
31-vjeçari shqiptar, i cili ndodhet momentalisht i burgosur në burgun e Koridhalosit në Greqi, ka rrëfyer për mediat greke jetesën atje. I riu shqiptar është dënuar me burgim të përjetshëm pasi akuzohet për dy vrasje, në Athinë dhe Selanik.
Në lidhje me këto ngjarje ai ka rrëfyer se është arrestuar pa fakte dhe pa asnjë lloj prove, pa u gjetur asnjë armë krimi dhe pa ADN. “Unë për çdo akuzë për veprat penale që kam kryer i kam pranuar vet ashtu siç ka ndodhur dhe pa u trembur”, ka rrëfyer Dushku.
Ai akuzohet edhe si pjesëmarrës i disa organizatave terroriste në Greqi, “17 Nëntori” dhe “Grupi i Zjarrit”, diçka të cilën e ka pranuar.
Ai ka shtuar:
Akuzohem si bashkëpunëtor dhe anëtari i dy organizatave të njohura në Greqi asaj 17 Nëntori dhe Grupi i Zjarrit, gjë të cilën e kam pranuar dhe e pranoj se jam pjesë e tyre, por nga ana tjetër më akuzojnë për vënie bombash gjë të cilën nuk e kam bërë asnjë here.”
Plani i famshëm i arratisjes
Dushku kishte hartuar një plan arratisje nga burgu i Koridhalosit ku përfshihej hedhja në erë e murit të burgut dhe parashikohej arratisja e disa prej krerëve të mafias greke, por edhe pjesëtarëve të grupit gueril “Komploti i celulave të zjarrit”, që vuajnë dënime për akte terroriste.
Ky plan u zbulua vetëm pas një kontrolli të befasishëm në qelinë e tij pasi u gjet një armë zjarri e çmontuar, disa thika artizanale, doreza hekuri dhe telefona celulare. Në momentin kur gardianët hynë në qeli e gjetën Dushkun duke folur në Skype.
Hera e parë që në burgjet greke gjenden laptopë me internet
Si gjetja me e rëndësishme konsiderohen dy laptopë që madje ishin të lidhura me internet nëpërmjet një USB-je. Në momentin kur gardianët hynë në qeli e gjetën Dushkun duke folur në Skype. Kjo u shënua si hera e parë që gjenden laptopë në burgjet greke.
Plani mendohet do të vihej në zbatim më 4 shkurt, ditën e manifestimit të protestës kundër emrit të Maqedonisë, ku do të përqendrohej gjithë vëmendja e forcave të rendit. Mendohet se të burgosurit do të merrnin peng gardianët dhe do t’i kërcënonin derisa t’u hapeshin dyert e hekurta dhe rruga drejt lirisë.
Për atë tentativë Fabio Dushku u dënua me 8 vjet burg, ndërsa gjatë procesit gjyqësor ishte shprehur krenar për miqësinë e tij me guerilasit e “Komplotit të Celulave të Zjarrit”. Ky dënim i ri iu shtua burgimit të përjetshëm që ishte caktuar për Dushkun.
Shqiptari aktiv në rrjetet sociale
Sipas mediave greke, Fabio Dushku kishte dhe profilin e vet ne Facebook, me emrin “Vrasësi profesionist”, ndërsa kishte publikuar edhe lidhje me Skype dhe shfaqej tejet aktiv në rrjetet sociale.
Postimet me “Fuck the police” dhe “Rroftë Anarkia” mbizotërojnë kudo. Shqiptari gjithashtu duket një fans i armëve dhe makinave të shtrenjta. I riu duket i apasionuar për të krijuar miqësira virtuale, ndërsa i pëlqejnë edhe këngët greke.
Fabio Dushku, mik i Alket Rizait
Mes shumë gjërave që ka postuar Fabio Dushku, spikat edhe një foto ku shihet bashkë me Alket Rizain, shqiptarin e njohur për arratisjet e tij të bujshme, që sot vuan ende dënimin në burgjet greke. Po ashtu, Dushku i kishte kushtuar rëndësi edhe vrasjes së bujshme e Vasilis Stefanakos, i cilësuar si ‘koka’ e mafias në Greqi si dhe njihet për lidhjen e tij të ngushtë me shqiptarin Alket Rizain. Stefanakos u qëllua me 11 plumba nga breshëria e një kallashnikovi.
Dushku i kushtoi një status prekës Stefanakos, ndërsa nuk nguron që ta quajë atë edhe mik. Madje në shenjë solidarizimi, më 17 janar, ditën kur ndodhi vrasja e Stefanakos, Dushku kishte vendosur edhe një fjongo të zezë në profilin e tij. /albeu.com/
