Ekipi i Hellas Verona i shkaktoi një barazim dramatik Napolit, duke i lënë këta të fundit jashtë Champions League për sezonin tjetër.
Një barazim ky, i cili kualifikoi Juventusin për në Champions. Pas ndeshjes, trajneri i Veronës Ivan Juriç doli të fliste për “Sky Sports”, aty ku intervista u mbyll me tension.
Trajnerit i thanë se si ka mundësi që Verona ka regjistruar disa rezultate negative në ndeshjet e fundit dhe ia del ta ndalë Napolin në një ndeshje vendimtare për këta të fundit.
Edhe ndërhyrja nga studio nuk e qetësoi trajnerin Juric, i cili gjithsesi i dha një mundësi tjetër gazetarit për të riformuluar pyetjen. Por, gazetari nuk e shfrytëzoi: “Pamë sot një Veronë me motivim ndryshe…”.
Juric ia ktheu: “Prapë ti? Po tregon mungesë respekti. Nuk e pranoj diskutimin “ditët e tjera jo, sot po”. Skuadra ka dhënë gjithmonë maksimumin. Nuk shkon kështu, duhet të më kërkosh falje”.
Pas kësaj, trajneri u largua nga intervista.
