Ministri i Punëve të Brendshme, Ervin Demo, ka reaguar përsëri lidhur me protestën e studentëve, duke kërkuar vetëpërmbajtje dhe zbatim të barabartë të ligjit. Ai ka dënuar kategorikisht sulmet kundër punonjësve të Policisë dhe dëmet në pronën publike e private, duke theksuar se e drejta për të protestuar nuk përligj dhunën ndaj njerëzve apo institucioneve.
Në reagimin e tij, të drejtuar qytetarëve, Demo i cilësoi shqetësuese ngjarjet e sotme përpara Ministrisë së Arsimit. Ministri shprehu shqetësim për të gjithë të lënduarit, qofshin studentë, qytetarë, gazetarë apo punonjës policie, dhe u uroi shërim sa më të shpejtë. Sipas tij, institucionet përgjegjëse do të bëjnë publik bilancin e plotë të të lënduarve, pasi ai të jetë verifikuar.
Të lidhura
None found
Demo nënvizoi se shteti shqiptar e garanton plotësisht protestën paqësore si një të drejtë demokratike. Megjithatë, ai theksoi se kjo e drejtë themelore nuk mund të shërbejë si arsyetim për dhunën kundër personave dhe institucioneve, ndërsa kundërshtoi pa rezerva sulmet ndaj Policisë dhe dëmtimin e pronave publike e private.
Ministri kujtoi se mbrojtja e qytetarëve, institucioneve dhe sigurisë publike është detyrim i Policisë së Shtetit. Ai tha se efektivët duhet të mbështeten kur kryejnë detyrën në përputhje me ligjin dhe se mbrojtja nga çdo sulm ndaj tyre është gjithashtu pjesë e detyrës së tyre.
Nga ana tjetër, Demo kërkoi që ndërhyrjet e Policisë të përmbushin kriteret e ligjshmërisë, domosdoshmërisë dhe proporcionalitetit. Ai bëri të ditur se organet kompetente do të vlerësojnë në mënyrë të paanshme çdo pretendim për forcë të përdorur në kundërshtim me ligjin ose në masë joproporcionale, pa paracaktuar rezultatet e hetimit.
Për zbardhjen e çdo detaji të mundshëm, ministri theksoi nevojën që të ruhen dhe të verifikohen të gjitha pamjet dhe dëshmitë që mund të ndihmojnë në këtë proces.
Sipas Demos, askush nuk duhet të trajtohet ndryshe përpara ligjit. Përgjegjësia duhet të vlerësohet për secilin veçmas, duke u mbështetur në prova; fakti që dikush ndodhet në të njëjtën protestë nuk e ngarkon atë me përgjegjësi për veprimet e personit që ka pranë.
Ai deklaroi se u ka kërkuar strukturave përgjegjëse të ndërmarrin masa për të zbutur tensionet dhe për të shmangur përplasje të mëtejshme. Këto masa, sipas ministrit, duhet të sigurojnë njëkohësisht sigurinë publike dhe ushtrimin e së drejtës për protestë paqësore. Demo kërkoi gjithashtu që gazetarëve t’u mundësohet kryerja e punës në kushte të sigurta.
Në reagimin e tij, ministri iu referua edhe zhvillimit të sotëm në Luksemburg, ku Shqipëria mori një tjetër vlerësim për ecurinë drejt Bashkimit Europian, me mbylljen e përkohshme të një kapitulli tjetër të negociatave. Ai theksoi se ky hap shton përgjegjësinë për të zbatuar standardet europiane edhe në mënyrën se si institucionet përballen me kundërshtimet e kujtdo dhe mbrojnë të drejtat e qytetarëve.
Demo e mbylli mesazhin me një falënderim, duke nënvizuar se standardi europian nënkupton një shtet që ruan rendin, respekton liritë dhe mban përgjegjësi për veprimet e tij. Sipas ministrit, ky detyrim duhet përmbushur edhe pas ngjarjeve të sotme.
