Rreth 60 mijë njerëz janë larguar nga banesat e tyre në disa zona të shtetit të Uashingtonit, ndërsa zjarret e fuqishme pyjore përhapen në rrethinat e qytetit Spokane.
Të lidhura
None found
Situata vijon të mbetet e pakontrolluar. Flakët kanë shkatërruar afërsisht 600 ndërtesa dhe kanë ndërprerë energjinë elektrike për më shumë se 10 mijë konsumatorë. Përballë përmasave të dëmeve, autoritetet kanë shpallur gjendje të jashtëzakonshme.
Tre vatra të mëdha zjarri ishin ende aktive pranë Spokane të hënën. Kryetarja e bashkisë, Lisa Brown, e përshkroi ngjarjen si “katastrofën më të keqe natyrore që ka përjetuar rajoni”. Ajo tha se ekipet po punojnë për të vlerësuar dëmet dhe se nuk mund të përjashtohet mundësia e viktimave, megjithëse deri tani nuk është raportuar asnjë person i vdekur apo i lënduar.
Departamenti i Burimeve Natyrore të shtetit njoftoi se zjarret pranë Spokane janë pjesë e më shumë se një duzine vatrash aktive në të gjithë Uashingtonin, ku 10 prej tyre konsiderohen zjarre të mëdha.
Gjatë fundjavës, Shërbimi Kombëtar i Motit paralajmëroi për kushte “jashtëzakonisht kritike” që mund të favorizonin përhapjen e flakëve. Erërat e forta dhe moti tepër i thatë kanë ndihmuar në avancimin e shpejtë të zjarreve.
Pamjet e transmetuara nga Spokane shfaqin re të dendura tymi dhe flakë pranë zonave të banuara. Ndërkohë, helikopterët dhe ekipet e zjarrfikësve vijojnë përpjekjet për të kufizuar dhe vënë nën kontroll zjarret.
Përveç ndërtesave të dëmtuara, mbi 10 mijë klientë të kompanisë Avista Utilities kanë mbetur pa energji elektrike.
Guvernatori i shtetit të Uashingtonit, Bob Ferguson, shpalli gjendje të jashtëzakonshme në të gjithë territorin dhe kërkoi ndihmë federale, pas një bisede me presidentin e Shteteve të Bashkuara, Donald Trump.
Lisa Brown u kërkoi banorëve të tregohen të kujdesshëm dhe të zbatojnë urdhrat e evakuimit. Kryetarja e bashkisë theksoi gjithashtu se komuniteti ka nevojë për mbështetje shtesë, veçanërisht për strehimin dhe furnizimet bazë të personave të zhvendosur.
