Donald Trump ka rikthyer idenë e tij për ndryshimin e emërtimeve gjeografike, këtë herë duke vendosur në qendër të vëmendjes shtetin amerikan të Nju Meksikos.
Përmes një harte të publikuar në Truth Social, presidenti amerikan paraqiti emrin “Nju Meksiko” të transformuar në “Amerika e Re”. Në grafikën e shpërndarë prej tij, fjala “Meksikë” ishte fshirë simbolikisht me një “X” të madh të kuq dhe ishte zëvendësuar me “Amerikë”.
Të lidhura
None found
Harta u publikua nga llogaria zyrtare e Shtëpisë së Bardhë në X, pa shpjegime shoqëruese. Po ashtu, nuk është bërë e ditur ndonjë nismë zyrtare për ndryshimin e emrit të shtetit.
Presidenti amerikan nuk ka kompetencë ta ndryshojë i vetëm emrin e një shteti, ndryshe nga disa emërtime të veçorive gjeografike që mund të modifikohen për përdorim nga qeveria federale.
Publikimi ishte një prej 34 mesazheve që Trump shpërndau në Truth Social brenda më pak se një ore të dielën. Postimet trajtonin tema të ndryshme, mes tyre Iranin, ekonominë dhe zgjedhjet në Gjermani.
Ky është rasti më i fundit në një seri ndërhyrjesh të Trump në emërtimet gjeografike. Pas rikthimit në Shtëpinë e Bardhë në janar të vitit 2025, ai firmosi një urdhër ekzekutiv që përcaktonte përdorimin federal të emrit “Gjiri i Amerikës” në vend të Gjirit të Meksikës.
Më 27 gusht 2026, Trump nënshkroi një tjetër urdhër ekzekutiv, përmes të cilit Liqeni Ontario u riemërtua “Liqeni Amerika” për përdorim federal. Vendimi u mor në një periudhë kur marrëdhëniet tregtare mes SHBA-së dhe Kanadasë vazhdojnë të jenë të tensionuara.
Mes 34 publikimeve të tij ishte edhe një imazh i manipuluar, ku fytyra e Trump ishte vendosur mbi trupin e mundësit Hulk Hogan. Ky i fundit shfaqej me një shami ku shkruhej “MAGA”.
Në një tjetër grafik, kufijtë e Iranit ishin paraqitur në mënyrë të tillë që krijonin siluetën e fytyrës së presidentit amerikan, ndërsa konflikti ushtarak me Teheranin vijon prej më shumë se gjashtë muajsh.
Trump ndau gjithashtu disa grafikë që, sipas tij, tregonin rezultatet e administratës së tij në ekonomi.
Një tjetër postim përmbante një pamje ekrani që parashikonte rezultatin e zgjedhjeve të AfD-së në Saksoni-Anhalt. Këtë material ai e ripublikoi pa dhënë asnjë koment.
