Algjeria është përballur me më shumë se 100 zjarre pyjore gjatë ditëve të fundit, kryesisht në verilindje të vendit, pranë bregdetit të Mesdheut. Pavarësisht se pjesa më e madhe e tyre është shuar, flakët shkaktuan dëme të konsiderueshme dhe lanë dhjetëra persona të plagosur.
Të lidhura
None found
Pas këtyre ngjarjeve, presidenti algjerian Abdelmadjid Tebboune ka kërkuar rikthimin e dënimit me vdekje për personat që vënë zjarre. Të paktën 12 njerëz kanë humbur jetën nga zjarret gjatë këtij viti.
Presidenti i ka kërkuar Ministrisë së Drejtësisë të përgatisë ndryshimet në ligjin penal, në mënyrë që për zjarrvënësit të parashikohet dënimi kapital, raportoi BBC.
Gjatë deklaratave të bëra të shtunën, Tebboune tha se do të zhvilloheshin hetimet e nevojshme, duke nënvizuar veçanërisht përmasat dhe intensitetin e zjarreve.
Një ditë më vonë, ai caktoi 15 shtatorin si afat për miratimin e amendamenteve që synojnë vendosjen e dënimit me vdekje për ndezjen e qëllimshme të zjarreve në zonat pyjore.
Legjislacioni në fuqi e dënon aktualisht zjarrvënien e qëllimshme në pyje me një dënim deri në 30 vjet burg. Në rrethana të caktuara, masa mund të jetë edhe burgimi i përjetshëm.
Edhe pse dënimi me vdekje vijon të jetë pjesë e kodit penal algjerian për disa vepra penale, ekzekutimi i fundit në vend është kryer në vitin 1993.
