Rezultatet e para të sondazheve pas mbylljes së votimit në zgjedhjet shtetërore të Saksonisë-Anhaltit nxjerrin në krye Alternativën për Gjermaninë (AfD), me 44.5% të votave, sipas të dhënave të ARD-së.
Të lidhura
None found
CDU-ja parashikohet të sigurojë 18.5%, duke e përgjysmuar mbështetjen e saj në krahasim me zgjedhjet e vitit 2021. Ndërkohë, e Majta vlerësohet me 9.5%, të Gjelbrit me 9% dhe SPD-ja me 8%, me ndryshime relativisht të vogla.
Në ndarjen e pritshme të mandateve, AfD-ja mund të marrë 39 vende, CDU-ja 16, e Majta 8, ndërsa të Gjelbrit dhe SPD-ja nga 7 vende secila. BSW-ja parashikohet të sigurojë 5 mandate.
Parlamenti lokal i Saksonisë-Anhaltit ka 83 vende dhe për krijimin e një shumice kërkohen të paktën 42 mandate.
Në raport me zgjedhjet e vitit 2021, AfD-ja ka shënuar një rritje prej 23.7%, duke iu afruar dyfishimit të rezultatit të mëparshëm. Në të kundërt, CDU-ja ka humbur 18.6%, ose gjysmën e forcës së saj. Rënia e mbështetjes ka qenë më e kufizuar për të Majtën, me 1.5%, dhe për SPD-në, me 0.4%.
Kjo është hera e parë që një forcë e ekstremit të djathtë në Gjermani i afrohet kaq shumë mundësisë për të krijuar një qeveri në nivel shtetëror.
Edhe sondazhet para përfundimit të procesit zgjedhor e vendosën AfD-në pranë nivelit 40%. Tashmë, pyetja kryesore që pritet të marrë përgjigje deri në fund të natës së zgjedhjeve është nëse partia do ta kalojë pragun e vetëqeverisjes.
