Japonia lindore është përfshirë nga reshje rekord, të cilat autoritetet i kanë përshkruar si “të paprecedenta”. Përmbytjet, rrëshqitjet e dheut dhe ndërprerjet e energjisë elektrike të shkaktuara nga stuhitë u kanë marrë jetën të paktën tetë personave.
Të lidhura
None found
Ndër zonat që kanë pësuar dëmet më të mëdha është prefektura Chiba, pranë Tokios. Në këtë rajon janë matur mbi 100 milimetra reshje brenda një ore, shifra më e lartë e regjistruar ndonjëherë atje dhe afërsisht tri herë më e madhe se mesatarja e reshjeve për muajin gusht.
Mbi 20 mijë familje kanë mbetur pa energji elektrike. Në të njëjtën kohë, më shumë se 100 mijë familje janë udhëzuar të largohen nga banesat, për shkak të rrezikut që përmbytjet dhe rrëshqitjet e dheut paraqesin për zonat e populluara.
Mediat japoneze raportojnë se bilanci ka arritur në të paktën tetë viktima. Njëra prej tyre është një grua që vdiq në automjetin e saj pasi makina u përfshi nga ujërat. Dy persona të tjerë u rrëzuan në rrugë dhe ndërruan jetë më vonë.
Guvernatori i Chibës, Toshihito Kumagai, deklaroi se situata është tejet e pazakontë, madje edhe krahasuar me standardet e motit ekstrem që përjeton Japonia.
Operacionet për shpëtimin e njerëzve janë përcaktuar si përparësia kryesore e autoriteteve. Ato kanë paralajmëruar se niveli i rrezikut nga përmbytjet dhe rrëshqitjet e dheut vazhdon të jetë i lartë.
Pasojat janë ndier rëndë edhe në sistemin e transportit. Mijëra udhëtarë kaluan natën të bllokuar në aeroportin Narita të Tokios, ndërsa probleme pati edhe në qendra të tjera transporti. Qarkullimi hekurudhor u pezullua dhe disa prej autostradave kryesore u mbyllën.
Parashikimet tregojnë se reshjet do të vijojnë deri në orët e vona të së premtes. Autoritetet u kanë kërkuar banorëve të bëjnë kujdes të shtuar përballë mundësisë së përmbytjeve dhe rrëshqitjeve të dheut.
