Për herë të parë, kokaina ka kaluar naftën bruto dhe është shndërruar në produktin me vlerën më të lartë të eksporteve të Kolumbisë.
Të lidhura
None found
Të dhënat e një studimi të Universitetit EAFIT në Medellín tregojnë se eksportet e paligjshme të kokainës gjatë vitit 2024 kapën një vlerë të përllogaritur prej 16.5 miliardë dollarësh. Në të njëjtën periudhë, eksportet e naftës gjeneruan rreth 15 miliardë dollarë.
Ky ndryshim pasqyron rritjen e shpejtë të ekonomisë së drogës në vend. Kolumbia vazhdon të jetë prodhuesi më i madh i kokainës në botë dhe besohet se mbulon rreth 70% të furnizimit global.
Prodhimi vjetor ka shënuar një zgjerim të jashtëzakonshëm, nga më pak se 300 tonë metrikë në vitin 2013 në afro 3,000 tonë në vitin 2024. Si pasojë, ekonomia e kokainës përbën tashmë rreth 4.4% të PBB-së së Kolumbisë, krahasuar me vetëm 0.8% në vitin 2013.
Sipas raportit, vlera e produktit rritet në çdo hallkë të zinxhirit të trafikimit. Në zonat rurale ku kultivohet bima e kokës, një kilogram lëndë kushton rreth 468 dollarë. Pas përpunimit në laboratorë të paligjshëm, çmimi arrin në rreth 1,400 dollarë për kilogram.
Vlera rritet edhe më tej pasi kokaina largohet nga Kolumbia dhe hyn në rrjetet ndërkombëtare të shpërndarjes. Për kartelet kolumbiane, çmimi mesatar pas eksportit vlerësohet në rreth 5,929 dollarë për kilogram, ndërsa në tregjet evropiane çmimi me shumicë mund të kapërcejë 78 mijë dollarë për kilogram.
Studiuesit vlerësojnë se shtrirja e rrjeteve ndërkombëtare të shpërndarjes u ka dhënë grupeve kriminale kolumbiane mundësinë të marrin një pjesë gjithnjë e më të madhe të fitimeve të krijuara në tregjet e huaja.
Pas kokainës dhe naftës, në listën e eksporteve kolumbiane renditet qymyri, me rreth 7.1 miliardë dollarë. Ndërkohë, eksportet e ligjshme të arit kanë një vlerë prej rreth 4.1 miliardë dollarësh.
