Tre zjarrfikës kanë humbur jetën teksa luftonin zjarret e mëdha në Greqi, në një kohë kur temperaturat e larta dhe flakët vazhdojnë të rrezikojnë disa shtete të Evropës Jugore.
Të lidhura
None found
Dy zjarrfikës vdiqën në ishullin e Kretës, ku u rrethuan nga zjarri në zonën e Rethymnos. Përhapja e flakëve, e nxitur nga erërat e fuqishme, bëri të nevojshëm evakuimin e disa fshatrave. Viktima e tretë, gjithashtu zjarrfikës, u gjet pa ndjenja pranë qytetit portual Gytheio, në pjesën jugore të Peloponezit.
Fshati malor Krya Vrysi u braktis nga banorët dhe turistët. Dëshmitarët raportuan momente paniku, ndërsa flakët përparuan me shpejtësi dhe fronti i zjarrit u shtri deri në 15 kilometra. Vatra të tjera u evidentuan në ishujt Paros dhe Lesbos, por edhe në rajonin e Trifilisë, në Greqinë kontinentale.
Gjendja paraqitet e rëndë edhe në Turqi. Një zjarr në provincën Muğla çoi në mbylljen e autostradës mes Fethiyes dhe Antalias, si dhe në evakuimin e një pjese të një spitali.
Spanja, ndërkohë, është përfshirë nga vala e katërt e të nxehtit gjatë kësaj vere. Kryeministri Pedro Sánchez deklaroi se 12 orët në vijim do të jenë përcaktuese për kontrollin e zjarrit që po digjet pranë Madridit.
Në provincën Ávila janë shkrumbuar më shumë se 43 mijë hektarë tokë. Sipas autoriteteve, bëhet fjalë për zjarrin më të madh të dokumentuar ndonjëherë në historinë e Spanjës. Pavarësisht kësaj, heqja e kufizimeve në disa zona u ka mundësuar mijëra banorëve të fillojnë kthimin në banesat e tyre.
Në gjendje alarmi vazhdon të jetë edhe jugperëndimi i Francës. Zyrtarët kanë bërë të ditur se termometri mund të shënojë deri në 41 gradë Celsius, kurse erërat e thata shtojnë mundësinë që vatrat e zjarrit të aktivizohen sërish. Masat e sigurisë janë përforcuar nga autoritetet edhe për mbrojtjen e objekteve të industrisë së mbrojtjes dhe hapësirës ajrore.
Kontinenti evropian po kalon një nga verat më të nxehta të viteve të fundit. Shërbimi Evropian për Ndryshimet Klimatike “Copernicus” thotë se Evropa po ngrohet më shpejt se çdo kontinent tjetër në botë, duke rritur rrezikun nga valët ekstreme të vapës dhe zjarret me pasoja shkatërruese.
