Një rrjedhje e mundshme e gazit natyror nga një apartament po konsiderohet si pista kryesore e hetimit për shpërthimin në një ndërtesë në zonën Plaka të Athinës, ku jetën e humbën gjashtë persona. Mes viktimave janë Florida Hoxha, bashkëshorti i saj Ian Alexander Kirkpatrick, Eris Çani dhe Florin Hoxha.
Specialistët e Drejtorisë së Parandalimit të Krimeve të Zjarrvënies kanë verifikuar fillimisht rrjetin qendror të gazit natyror. Megjithatë, kontrollet dhe testet e kryera nuk zbuluan ndonjë rrjedhje në këtë sistem.
Të lidhura
None found
Inspektimet në trotuar dhe në linjën kryesore treguan se infrastruktura publike nuk paraqiste probleme. Për këtë arsye, vëmendja e autoriteteve është përqendruar te instalimet e brendshme të godinës.
Dyshimet lidhen veçanërisht me apartamentin në katin e dytë të ndërtesës në rrugën Lysikratous, ku banonte një çift i moshuar. Sipas të dhënave të mbledhura deri tani, kjo ishte banesa e vetme në godinë e lidhur me rrjetin e gazit natyror.
Në atë apartament janë gjetur tri pajisje që funksiononin me gaz: një sobë, një oxhak dhe një ngrohës uji. Ekspertët ende nuk kanë arritur të përcaktojnë nëse ndonjëra prej tyre ishte shkaku i rrjedhjes, ndaj po vijojnë punën për të sqaruar mënyrën se si ndodhi shpërthimi.
Forca e shpërthimit ishte aq e madhe sa shkaktoi shembjen e ndërtesës. Vala e goditjes dëmtoi gjithashtu objekte, biznese dhe automjete pranë vendit të ngjarjes.
Florida Hoxha dhe Ian Alexander Kirkpatrick ndodheshin në Greqi për muajin e mjaltit kur humbën jetën. Viktima ishin edhe Eris Çani dhe Florin Hoxha, të cilët ishin në pritje të bëheshin prindër.
Dy personat e tjerë që humbën jetën ishin banorë të ndërtesës ku ndodhi shpërthimi.
Më 27 shtator, familjarët e viktimave shkuan në Greqi pas kërkesës së autoriteteve. Ata pritet të japin material gjenetik për krahasimin e ADN-së, me qëllim përmbylljen e identifikimit të trupave.
Hetimi vazhdon për të përcaktuar burimin konkret të gazit dhe për të rindërtuar hap pas hapi rrethanat që çuan në këtë tragjedi.
