Bernë ishte nikoqire e konsultimeve politike mes Ministrisë së Punëve të Jashtme dhe Diasporës së Republikës së Kosovës dhe Departamentit Federal të Punëve të Jashtme të Zvicrës.
Takimi u drejtua nga Ilir Muçaj, Sekretar i Përgjithshëm i MPJD-së, dhe Pierre-Yves Fux, Ndihmëssekretar i Shtetit në Departamentin Federal të Punëve të Jashtme të Zvicrës.
Të lidhura
None found
Në përbërje të delegacionit kosovar ishin Mentor Latifi, Ambasador i Republikës së Kosovës në Zvicër; Valdrin Grainca, U.D. Udhëheqës i Divizionit për Evropë dhe Bashkimin Evropian; znj. Fatmire Musliu, Zyrtare e Lartë; si dhe Gjenis Haxhimehmeti, Sekretar i Dytë.
Bisedimet u përqendruan te marrëdhëniet e mira mes Kosovës dhe Zvicrës, si dhe te rrugët për zgjerimin e bashkëpunimit politik, ekonomik dhe institucional. Në diskutime u përfshinë vijimi i dialogut politik, vizitat e ndërsjella në nivele të larta dhe bashkëpunimi në sektorë me interes për të dyja palët.
Ilir Muçaj vlerësoi përkrahjen e pandërprerë të Zvicrës për zhvillimin e Kosovës dhe konsolidimin e pozitës së saj ndërkombëtare. Ai shprehu mirënjohje edhe për rolin zviceran në ruajtjen e sigurisë, përmes pjesëmarrjes në KFOR.
Një pjesë e veçantë e takimit iu kushtua çështjeve ekonomike, përfshirë shtimin e investimeve zvicerane në Kosovë, rritjen e tregtisë dhe lidhjet më të forta mes komuniteteve të biznesit. Palët theksuan rëndësinë e hyrjes në fuqi më 1 tetor 2026 të Marrëveshjes së Tregtisë së Lirë mes Kosovës dhe shteteve anëtare të EFTA-s, ku bën pjesë edhe Zvicra. Sipas diskutimeve, kjo marrëveshje përbën një mundësi të rëndësishme për zhvillimin e mëtejshëm të raporteve ekonomike. Po ashtu, u trajtuan bashkëpunimi zhvillimor dhe projektet në mbështetje të zhvillimit ekonomik e institucional të Kosovës.
Përfaqësuesit diskutuan gjithashtu për diasporën kosovare në Zvicër, kontributin e saj në të dyja vendet dhe ndikimin në forcimin e marrëdhënieve shoqërore, ekonomike e kulturore mes tyre.
Gjatë konsultimeve u shkëmbyen qëndrime edhe për situatën në Ballkanin Perëndimor, sigurinë e rajonit dhe perspektivën evropiane të Kosovës. Në kuadër të çështjeve shumëpalëshe, vëmendje mori anëtarësimi i Kosovës në organizata ndërkombëtare, përfshirë Këshillin e Evropës, si dhe mundësia e koordinimit të mëtejshëm me Zvicrën.
Delegacioni i Kosovës konfirmoi gatishmërinë për të vazhduar konsultimet periodike dhe për të ndjekur çështjet e diskutuara, me synimin e forcimit të mëtejshëm të marrëdhënieve dypalëshe.
