Në Kampin Vrellë është mbajtur ushtrimi i përbashkët “Golden Sabre 2026”, i drejtuar nga KFOR-i, i konceptuar mbi skenarë që lidhen me reagimin ndaj emergjencave dhe menaxhimin e krizave në Kosovë.
Të lidhura
None found
Ministri në detyrë i Mbrojtjes, Ejup Maqedonci, bëri të ditur se në këtë ushtrim ndërinstitucional ishte e përfshirë edhe FSK-ja.
“Qëllimi i ushtrimit ishte testimi i procedurave operacionale, komunikimit dhe koordinimit ndërmjet institucioneve përgjegjëse për sigurinë dhe reagimin emergjent, me synim forcimin e gatishmërisë dhe rritjen e efektivitetit në përballimin e situatave të ndryshme.
Forca e Sigurisë së Kosovës mori pjesë me njësitë e Gardës Kombëtare të Kërkim-Shpëtimit, EOD-së dhe ekipet mjekësore, të cilat dëshmuan profesionalizëm, gatishmëri të lartë dhe aftësi të avancuara operacionale gjatë realizimit të detyrave.
Pjesë e ushtrimit ishin edhe KFOR-i, Policia e Kosovës, Agjencia e Menaxhimit Emergjent (AME) dhe EULEX-i, duke reflektuar rëndësinë e bashkëpunimit ndërinstitucional dhe me partnerët ndërkombëtarë në forcimin e kapaciteteve për reagim ndaj emergjencave”, shkroi në Facebook, Maqedonci.
