Kuvendi i Kosovës miratoi deklaratën për aktgjykimin e shkallës së parë të Dhomave të Specializuara në Hagë ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, me 99 vota për, asnjë kundër dhe asnjë abstenim.
Të lidhura
None found
Deputeti i Lidhjes Demokratike të Kosovës (LDK), Besian Mustafa, djali i veprimtarit të LDK-së, Xhemajl Mustafa, nuk ishte i pranishëm në sallë në çastin kur u votua deklarata.
Sipas informatave të siguruara nga KosovaNews, Mustafa kishte marrë pjesë në seancë, por u largua nga salla para zhvillimit të votimit.
Dokumenti i miratuar nga Kuvendi përbëhet nga shtatë pika.
Me pikën e parë, Kuvendi shpreh shqetësim të thellë për aktgjykimin e shkallës së parë të dhënë ndaj ish-krerëve të UÇK-së.
Pika e dytë e deklaratës e cilëson si të papranueshëm konstatimin për ekzistencën e një qëllimi të përbashkët kriminal.
Në pikën e tretë, institucioneve shtetërore u kërkohet të ndërmarrin masat e nevojshme për ruajtjen e së vërtetës dhe pastërtisë së luftës çlirimtare të popullit të Kosovës. Gjithashtu, kërkohet hartimi i një strategjie të përbashkët shtetërore për koordinimin e veprimeve juridike, institucionale dhe diplomatike.
Pika e katërt nënvizon se ekzistenca e një ndërmarrjeje të përbashkët kriminale për dëbimin e shqiptarëve nga Kosova gjatë viteve 1998–1999 është dëshmuar përmes aktgjykimeve të Tribunalit Ndërkombëtar për ish-Jugosllavinë ndaj drejtuesve politikë, ushtarakë dhe policorë të Jugosllavisë dhe Serbisë.
Përmes pikës së pestë, Dhomave të Specializuara u kërkohet që mandatin e tyre ta ushtrojnë në përputhje me vullnetin e Kuvendit të Republikës së Kosovës.
Në pikën e gjashtë, Kuvendi kundërshton çdo përpjekje për ta përmbysur atë që e quan të vërtetën historike të Kosovës, për ta vënë në pikëpyetje luftën çlirimtare ose për ta barazuar popullin që luftoi për liri dhe mbijetesë me regjimin që e shtypi atë.
Pika e fundit thekson se e vërteta e luftës çlirimtare, drejtësia për viktimat dhe familjet e tyre, si dhe e drejta e të dënuarve për një gjykim të drejtë, i përkasin së njëjtës Republikë. Në deklaratë thuhet se Kuvendi do t’i mbrojë të tria.
Miratimi i deklaratës u bë me 99 vota për, ndërsa nuk pati asnjë votë kundër dhe asnjë abstenim.
