Një çështje që ka të bëjë me projektin për ndërtimin e fabrikës së re të kompanisë Knauf në Dibër pritet të hidhet në votim të hënën në Këshillin e Komunës. Këtë informacion InfoShqip e ka siguruar nga burime brenda Komunës së Dibrës, të cilat kanë kërkuar të mos identifikohen.
Të lidhura
None found
Synimet e Knauf për realizimin e një investimi të ri ishin bërë publike edhe më parë. Kryetari i Komunës së Dibrës, Fisnik Mela, gjatë janarit të këtij viti vizitoi selinë e kompanisë në Iphofen të Gjermanisë. Në njoftimin e publikuar atëherë nga Komuna thuhej se në takim ishte diskutuar edhe mundësia e ndërtimit të një fabrike të re, me kapacitete prodhuese dukshëm më të mëdha. Vlera e parashikuar e investimit ishte rreth 44 milionë euro.
Vëmendje pritet t’i kushtohet edhe ndikimit të mundshëm të projektit në mjedis, sidomos për shkak se lokacioni i planifikuar ndodhet në zonën qendrore të qytetit. Për këtë arsye, është e rëndësishme që publikut t’i bëhen të ditura vlerësimet mjedisore, masat e planifikuara për mbrojtjen e ajrit dhe të mjedisit, si dhe standardet që duhet të përmbushë një investim i këtij lloji.
Ende nuk dihet se çfarë propozimi konkret do t’u paraqitet këshilltarëve dhe si do të përfundojë votimi i së hënës. InfoShqip do t’i përcjellë zhvillimet dhe do ta njoftojë opinionin për çdo informacion të ri. /InfoShqip.com
