Conor Kennedy, djali i sekretarit amerikan të Shëndetësisë, Robert F. Kennedy Jr., është shpallur në kërkim nga autoritetet ruse, pasi akuzohet për pjesëmarrje si mercenar në luftën në Ukrainë.
Të lidhura
None found
Gjykata e Rrethit Basmanny në Moskë ka urdhëruar arrestimin e tij në mungesë. Vendimi u bë publik më 12 gusht nga agjencia shtetërore ruse TASS, e cila raportoi se Kennedy përballet me akuzën e “mercenarizmit” sipas Kodit Penal të Federatës Ruse. Për këtë vepër parashikohet një dënim nga shtatë deri në dhjetë vjet burg.
Avokati i Conor Kennedyt e kundërshtoi vendimin në apel, por gjykata e la atë në fuqi.
Stërnipi i presidentit John F. Kennedy iu bashkua Legjionit Ndërkombëtar të Ukrainës në vitin 2022, pas nisjes së pushtimit rus në shkallë të plotë. Sipas të dhënave, shërbimi i tij zgjati për një periudhë të shkurtër dhe ai u largua në tetor të po atij viti.
Në një postim të publikuar në Instagram në tetor 2022, Kennedy tregoi se ngjarjet që kishte parë gjatë atij viti në Ukrainë e kishin prekur thellë. Ai tha se nuk kishte pasur përvojë ushtarake përpara rekrutimit dhe se vendimin e kishte ndarë vetëm me një numër shumë të kufizuar njerëzish: një personi në Shtetet e Bashkuara i kishte treguar vendndodhjen e tij, ndërsa një personi në terren i kishte dhënë emrin e vërtetë.
Sipas tij, qëllimi ishte të mos shqetësoheshin familjarët dhe miqtë, si edhe të mos “trajtohesha ndryshe atje”.
Legjioni Ndërkombëtar u krijua në fillim të vitit 2022, duke mbledhur vullnetarë të huaj që shërbenin si ushtarë të rregullt dhe në të njëjtat kushte me trupat ukrainase. Rusia e ka kundërshtuar vazhdimisht këtë status juridik dhe i ka cilësuar luftëtarët e huaj si mercenarë.
Legjioni u shpërbë në shkurt 2026, ndërsa luftëtarët e huaj u transferuan në njësitë e rregullta të Forcave të Armatosura të Ukrainës.
Robert F. Kennedy Jr. u betua më 13 shkurt si sekretari i 26-të i Shëndetësisë në administratën e presidentit Donald Trump.
