Punonjësit e Ministrisë së Punëve të Brendshme kanë mbetur pa sigurim shëndetësor, pasi nuk janë paguar kontributet për kolegët e tyre të rikthyer në punë përmes vendimeve gjyqësore, bëjnë të ditur nga Fondi për Sigurim Shëndetësor (FSSH).
Të lidhura
None found
Në një prononcim për “Sloboden Peçat”, nga FSSH-ja sqarojnë se kjo situatë nuk lidhet me ndonjë defekt teknik apo ndërprerje të sistemit të Fondit. Sipas tyre, sigurimi shëndetësor bëhet aktiv automatikisht sapo në sistem të regjistrohen kontributet e paguara.
Të dhënat e evidentuara tregojnë se Ministria e Punëve të Brendshme ka regjistruar punonjës të cilët janë kthyer në vendet e tyre të punës në bazë të vendimeve gjyqësore. Megjithatë, për disa prej tyre nuk figuron pagesa përkatëse e kontributeve të sigurimit shëndetësor për periudhën në të cilën janë regjistruar aktualisht.
Fondi thekson se bëhet fjalë për një mekanizëm të përcaktuar nga sistemi, i cili zbatohet në mënyrë të njëjtë ndaj të gjitha subjekteve juridike në vend. Regjistrimi i të punësuarve, përllogaritja dhe pagesa e kontributeve zhvillohen përmes sistemit të mbledhjes së kontributeve të Zyrës së të Ardhurave Publike, ndërsa FSSH-ja evidenton statusin duke u mbështetur në të dhënat për pagesat e realizuara.
Kur punonjësit regjistrohen në mënyrë shtesë te një person juridik për një periudhë të mëparshme, duhet të korrigjohet përllogaritja e pagës për periudhën përkatëse dhe të paguhen kontributet për personat e shtuar. Pas evidentimit të pagesës, sigurimi shëndetësor aktivizohet vetvetiu.
Sipas FSSH-së, kjo nuk përbën një vendim individual administrativ të Fondit dhe as përjashtim manual të personave të siguruar nga punonjësit e tij. Procedura zhvillohet në mënyrë sistematike dhe të automatizuar, ndërsa rregullat zbatohen pa përjashtim për çdo punëdhënës dhe institucion.
