Ministri izraelit i Mbrojtjes, Israel Katz, deklaroi gjatë një aktiviteti në një bazë ajrore se Forcat Mbrojtëse të Izraelit (IDF) janë të përgatitura të rinisin operacionet ushtarake ndaj Iranit, nëse kjo vlerësohet e domosdoshme.
Të lidhura
None found
Ai bëri të ditur se ushtria izraelite ndodhet në gatishmëri për të rimarrë epërsinë ajrore dhe për të goditur sërish objektiva iraniane, me synimin për të neutralizuar kërcënimet ndaj Izraelit.
“IDF është gati dhe në gatishmëri për të rifilluar operacionet ushtarake me qëllim rifitimin e epërsisë ajrore dhe për të goditur përsëri Iranin për të eliminuar kërcënimet, për herë të tretë, nëse është e nevojshme”, deklaroi ai.
Katz nënvizoi gjithashtu se, nëse rrethanat e imponojnë, Izraeli do të ndërmarrë një tjetër operacion ushtarak me një intensitet edhe më të lartë.
“Nëse na duhet të kthehemi, do të kthehemi me forcë edhe më të madhe”, u shpreh Katz.
Ministri i Mbrojtjes lëshoi edhe një mesazh të drejtpërdrejtë për Teheranin, duke theksuar se Izraeli ka kapacitetin të godasë objektiva në çdo zonë të territorit iranian.
“Krahu i gjatë i Izraelit do t’ju arrijë në Teheran, Tabriz, Isfahan dhe kudo tjetër që përpiqeni të kërcënoni Izraelin dhe ta dëmtoni atë. Nuk ka vend ku mund të fshiheni”, tha ministri i Mbrojtjes.
Këto deklarata vijnë në një moment kur tensionet mes Izraelit dhe Iranit vijojnë, ndërsa gjuha e përdorur nga të dyja palët mbetet e ashpër.
