Gjatë natës së dytë të ofensivës së rifilluar ndaj Republikës Islamike, forcat amerikane goditën 90 objektiva ushtarake iraniane.
Të lidhura
None found
Ministria iraniane e Shëndetësisë njoftoi se bilanci i sulmeve të dy ditëve të fundit në pesë provinca të vendit ka shkuar në 14 viktima dhe 78 të plagosur.
Si kundërpërgjigje, rojet revolucionare goditën me dronë kamikazë një sistem të mbrojtjes raketore Patriot në Kuvajt, një sistem paralajmërimi të hershëm në Katar, si edhe depo karburanti në Bahrein. Sipas deklaratës së tyre, “nëse agresioni përsëritet, përgjigjja jonë dërrmuese do të shtrihet edhe ndaj bazave të tjera amerikane në rajon.”
Mohammad Bagher Ghalibaf, kryenegociatori i Iranit me SHBA-në, u shpreh se Amerika “ende nuk e ka kuptuar se bullizmi dhe shkelja e premtimeve nuk do të mbeten pa kosto”.
Sipas portalit Axios, që citon një zyrtar amerikan, faza aktuale e përshkallëzimit mes Uashingtonit dhe Teheranit mund të zgjasë një ose dy ditë, një javë, madje edhe një muaj, në varësi të faktit nëse Irani do t’i vazhdojë apo jo sulmet kundër anijeve tregtare në Ngushticën e Hormuzit.
Zyrtarë amerikanë thonë se Shtëpia e Bardhë vlerëson se ende ekziston hapësirë për një përshkallëzim të mëtejshëm, duke qenë se gjatë javëve të fundit qindra anije cisternë kanë mundur të dalin nga Gjiri përmes Ngushticës së Hormuzit.
Edhe pse më pak se 24 orë më parë i quajti bisedimet “humbje kohe”, Donald Trump deklaroi se Irani kërkon “të arrijë një marrëveshje”, por shtoi se “nuk e di nëse ata e meritojnë”. Pavarësisht gjuhës së ashpër nga të dyja anët, negociatat dukej se ishin ende në vijim.
