Anastasiia Berezovska, e dyshuar si autorja e shpërthimit me bombë që tronditi Monakon në fund të qershorit, është gjetur e pajetë në Kiev, sipas mediave ukrainase.
Të lidhura
None found
Burime të cituara nga Pravda bëjnë të ditur se 39-vjeçarja u gjet pa jetë rreth orës 23:00 të së hënës, ndërsa dyshimet paraprake janë se ajo është vrarë me armë zjarri.
Për këtë vrasje, autoritetet në Ukrainë kanë vënë në pranga dy persona: një oficer në detyrë i Drejtorisë Kryesore të Inteligjencës dhe një ish-zyrtar të forcave të rendit.
Berezovska ishte në kërkim nga Interpol-i për shpërthimin e 29 qershorit në Monako, atentat që kishte në shënjestër biznesmenin ukrainas Vadim Ermolaev, 58 vjeç.
Sipas prokurorisë, ajo dyshohet se kishte lënë pranë apartamentit luksoz ku po qëndronte Ermolaev një çantë shpine me lëndë shpërthyese, ndërsa ishte e maskuar si burrë.
Si pasojë e shpërthimit, Ermolaev përfundoi në gjendje kritike. Anna Nasobina, 46 vjeç, që dyshohet se ishte partnerja e tij, mbeti e plagosur rëndë dhe humbi të dyja këmbët pas amputimit. Objektiv i sulmit ishte edhe djali i saj 13-vjeçar.
Kamerat e sigurisë kanë regjistruar një person, për të cilin besohet se është Berezovska, të ulur në një stol vetëm pak çaste përpara shpërthimit.
