Avokati Arianit Koci ka komentuar arrestimin e Osman Selmanit, shtetas i Kosovës, duke theksuar se klienti i tij nuk lidhet fare me veprën penale për të cilën dyshohet nga autoritetet serbe.
Të lidhura
None found
Sipas Kocit, Selmani është 74-vjeçar nga Sofalia dhe ndalimi i tij ka ndodhur në pikën kufitare ndërmjet Kosovës dhe Serbisë.
Ai bëri të ditur se posedon informacione për dyshimet që rëndojnë ndaj Selmanit, por në këtë fazë nuk mund të japë më shumë hollësi.
“Osman Selmani është 74-vjeçar i Sofalisë, është një burrë shumë i mirë, patriot. Por për çka e kanë arrestuar, lidhje nuk ka. Për momentin s’mundem me dhënë shumë informata, por është pjesë e arrestimeve që kanë filluar shumë më herët. Lajmi sot ka dalë, ai është arrestuar parmbrëmë në kufi mes Kosovës dhe Serbisë. Kam informacione se cilat janë dyshimet ndaj tij. Jam në kontakt me familjarët e tij. Nuk ka asnjë fije dyshimi për veprën për të cilën dyshohet ai në Serbi. S’ka lidhje me ato akuza”, deklaroi Koci në Klan Kosova.
Ndërkaq, kujtojmë se Gjykata e Lartë në Serbi i ka shqiptuar Selmanit masën e paraburgimit prej 30 ditësh, pasi ai u arrestua më 1 korrik në pikëkalimin kufitar të Mutivodës, nën dyshimet për kryerje të krimeve të luftës.
