Në mbledhjen e jashtëzakonshme të mbajtur të mërkurën, Këshilli Prokurorial i Kosovës (KPK) vendosi që intervistat e kandidatëve për pozitën e Kryeprokurorit të Shtetit të transmetohen.
Pas përfundimit të intervistimeve po atë ditë, Paneli Vlerësues bëri publike rezultatet, ku sipas poentimit kandidatët u renditën kështu: Zejnullah Gashi me 91.6 pikë, Atdhe Dema me 89.3 pikë, Naim Abazi me 89 pikë, Rafet Halimi me 87 pikë dhe Shqipdon Fazliu me 86.5 pikë, raporton “Betimi për Drejtësi“.
Të lidhura
None found
Anëtari Milot Krasniqi deklaroi se, për ta bërë procesin më transparent, është vendosur që video-intervistat të publikohen në platformat e sistemit prokurorial të Republikës së Kosovës.
Nga ana tjetër, kryesuesi Arian Gashi u shpreh se nga procesi i kaluar është krijuar një standard që intervistat të publikohen në kohë reale dhe se ky standard është dashur të respektohet.
“Për informacionin tuaj, nuk janë transmetuar menjëherë por pas disa ditëve nga procesi i kaluar”, tha Gashi.
Më pas, propozimi që video-intervistat të publikohen sot mori miratimin me gjashtë vota për dhe një kundër.
