Vetëm 65 për qind e fëmijëve në vend janë të vaksinuar kundër fruthit, përkatësisht me vaksinën MRP, bëri të ditur për TVM2 epidemiologia e Qendrës së Shëndetit Publik, Lulzime Bajrami. Ajo paralajmëroi se në Kosovë, Shqipëri dhe Serbi janë shënuar epidemi të fruthit, ndaj sëmundja mund të përhapet në çdo moment edhe në Maqedoni.
Të lidhura
None found
Bajrami u bëri thirrje prindërve që t’i vaksinojnë fëmijët, duke theksuar se niveli aktual prej 65 për qind është i pamjaftueshëm dhe nuk duhet të lejohet. Sipas saj, para imunizimit fëmijët duhet t’i nënshtrohen kontrolleve mjekësore për të vlerësuar praninë e infeksioneve, viruseve dhe gjendjen e imunitetit.
Epidemiologia hodhi poshtë pretendimet se vaksina kundër fruthit shkakton autizëm, duke iu referuar studimeve që dëshmojnë të kundërtën. Ajo tha se vaksinimi është mënyra e vetme për mbrojtjen e fëmijëve nga fruthi, ndërsa mosvaksinimi mund të sjellë komplikime të rënda te foshnjat dhe fëmijët, deri edhe në pasoja fatale.
