Pas tërmetit të fortë që goditi Venezuelën dhe la pas viktima si edhe dëme të konsiderueshme, Portugalia po bëhet gati të nisë një mision emergjent shpëtimi drejt vendit të Amerikës Latine.
Konfirmimi erdhi nga ministri i Jashtëm i Portugalisë, Paulo Rangel, i cili njoftoi se një skuadër me afro 50 specialistë ndodhet në gatishmëri për t’u dërguar në zonat e prekura.
Të lidhura
None found
Sipas tij, në këtë mision përfshihen njësi të specializuara të xhandarmërisë për operacione shpëtimi, ekipe të mbrojtjes civile, punonjës policie me qen kërkimi, si edhe staf mjekësor, ndër ta dy mjekë dhe dy infermierë.
Dislokimi i këtij ekipi do të kushtëzohet nga koordinimi logjistik dhe bashkëpunimi me autoritetet venezueliane, teksa Portugalia po e ndjek nga afër situatën në terren.
Autoritetet portugeze bënë të ditur se deri më tani nuk ka të dhëna për viktima mes shtetasve të tyre, por kanë konfirmuar se pesë portugezë rezultojnë të zhdukur në rajonin La Guaira, në veri të Karakasit. Mes tyre janë katër anëtarë të së njëjtës familje.
Më herët gjatë ditës, Presidenti José Seguro dhe Kryeministri Luis Montenegro shprehën mbështetjen dhe solidaritetin e tyre me popullin venezuelian, si edhe me komunitetin portugez që jeton në vend, duke përcjellë mesazhe për të gjithë të prekurit nga katastrofa.
Venezuela ka një nga komunitetet më të mëdha portugeze jashtë territorit të Portugalisë, me rreth 200 mijë qytetarë me origjinë portugeze. Sipas Ministrisë së Jashtme në Lisbonë, ky është komuniteti i dytë më i madh portugez në Amerikën Latine, i formuar nga valët e emigracionit që nisën në vitet 1940 dhe vijuan deri në vitet 1980.
