Pavarësisht se harxhohen miliona euro, sërish mungon siguria e faqeve online të institucioneve shtetërore dhe email-et e zyrtarëve të lartë, dhe këtë gjë e tregojnë hakerimit e dhjetra rasteve.
Gjithsesi, rasti i fundit nuk bën fjalë për një hakerim nga një grup i mirëfilltë hakerash, por nga një 15-vjeçar nga Vlora.
Policia thotë se e ka goditur rastin pas një hetimi 1-mujor nga Krimi Kibernetik dhe ka proceduar penalisht në gjendje të lirë të miturin, në kuadër të operacionit të koduuar “The Accountant”.
“Si rezultat i hetimeve, u dokumentua veprimtaria e kundërligjshme e një shtetasi të mitur 15 vjeç, banues në Vlorë, i cili dyshohet se gjatë muajit mars 2025 ka ndërhyrë në mënyrë të paautorizuar në të dhënat kompjuterike të disa institucioneve shtetërore (email-e dhe faqe zyrtare), duke shkaktuar ndërprerjen e funksionimit të tyre për periudha të caktuara kohore. Nga hetimet e deritanishme nuk ka rezultuar vjedhje të të dhënave apo dokumenteve konfidenciale nga këto sisteme”, – thuhet në njoftimin e bluve të qytetit bregdetar.
Autoritetet raportojnë se kanë sekuestruar disa pajisje, të cilat do t’i nënshtrohen ekzaminimeve të thelluara teknike, konkretisht: 5 kompjuterë laptop, 6 aparate celularë dhe 1 dron.
Policia thotë se vijojnë hetimet për dokumentimin e plotë të kësaj veprimtarie.
