Serbia ka provokuar sërish Kosovën, duke shkaktuar një tjetër incident të rëndë, pasi ka hequr flamurin e Kosovës në Kongresin e 49-të të UEFA-s që po mbahet në Beograd. Flamuri i Kosovës u ngrit dje në hyrje të sallës, ndërsa sot Federata e Futbollit e Serbisë ka hequr flamurin e Kosovës.
Ky institucion nëpërmjet një komunikate, ku ka kërkuar edhe falje gjithë serbëve.
“Kongresi i 49-të i UEFA-s po zhvillohet sot në Beograd, një nga ngjarjet më të mëdha që është mbajtur ndonjëherë në vendin tonë. Organizimi i jashtëzakonshëm u zbeh nga një neglizhencë e organizatorëve, të cilën një pjesëmarrës në Kongres u përpoq ta shfrytëzonte për interesa jo-futbollistike. Reaguam së bashku, shpejt dhe me vendosmëri, dhe me përgjegjësi të plotë informojmë publikun se nuk ka asnjë flamur apo simbol të Kosovës në Kongresin e UEFA-s sot në Beograd”, thuhet në komunikatë.
Pas kësaj reagoi federata e Kosovës, që këmbëngul se janë përfaqësuar në kongres me simbolet dhe flamurin e shtetit.
“E kuptojmë se prania e delegacionit të Kosovës në kryeqytetin serb, si dhe fakti që flamuri i shtetit tonë valëviti përkrah atyre të shteteve të tjera, vazhdon të jetë i papranueshëm për politikën dhe një pjesë të opinionit në Serbi. Megjithatë, shteti i Kosovës është një realitet i pakthyeshëm dhe sa më shpejt që ta pranojnë këtë, aq më shpejt do të kontribuojnë në normalizimin e marrëdhënieve sportive dhe shtetërore”, shkruan FFK-ja të enjten.
Ky incident ka ndodhur në një kohë që Shqipëria dhe Serbia kanë vendosur që të organizojnë së bashku europianin e vitit 2027 për moshat U-21.
