8 persona në bordin e një avioni JetBlue u lënduan të hënën, për shkak të turbulencave të forta, pak para uljes së avionit në Florida, SHBA.
Airbus A320 ishte nisur nga Guayaquil, Ekuador, me destinacion Fort Lauderdale, Florida. Në afërsi të Xhamajkës, pasagjerët përjetuan momente dramatike për shkak të turbulencave të forta.
Sapo avioni u ul në Florida, ambulancat morën shtatë pasagjerë të plagosur dhe një anëtar të ekuipazhit dhe u transportuan në një spital, tha JetBlue në një deklaratë.
Bordi Kombëtar i Sigurisë së Transportit (NTSB) dhe Administrata Federale e Aviacionit (FAA) kanë njoftuar një hetim për Fluturimin JetBlue 1256.
Në gusht, të paktën 11 persona u lënduan për shkak të turbulencave mbi Atlanta në një fluturim të Delta Air Lines.
Në korrik, katër u lënduan në një incident të ngjashëm në një fluturim të Allegiant Air nga Karolina e Veriut në Florida.
Sipas të dhënave të FAA, në vitin 2022 katër udhëtarë dhe 13 anëtarë të ekuipazhit të fluturimit u lënduan për shkak të turbulencave në fluturimet në Shtetet e Bashkuara./albeu.com
