Zbardhen detaje nga ngjarja ku 57-vjeçari u gjet i vrarë brenda mjetit të tij në aksin rrugor rural Polican-Suhë ditën e djeshme në Gjirokastër.
Mihal Thimjo dyshohet se është autori i ngjarjes, të cilin Policia e ka arrestuar në automjetin e tij në rrugën nacionale pranë lagjes së njohur si “Blloku i furrave”.
Mësohet se viktima, Gëzim Saraçi dhe autori i dyshuar, Mihal Thimjo kishin njohje të vjetër familjare me njëri – tjetrin. Madje ditën e ngjarjes, ata kishin drekuar bashkë në Poliçan të Zagorisë.
Mësohet se nga ngjarja edhe autori 33-vjeçar është plagosur në shpatull dhe në këmbë.
Viktima Gëzim Saraçi, banues në fshatin Humelicë të Gjirokastrës.
Babai i tre fëmijëve në moshë madhore, dy vajza e një djalë, ishte një emër i njohur për zonën pasi punonte rregullisht në këtë segment rrugor për transport mallrash, drurësh apo inertesh dhe njihej si një person i qetë në zonë.
Autori i dyshuar i krimit mësohet se po udhëtonte në të njëjtin mjet me viktimën Saraçi, në kamionçinën ku dhe u gjet i pajetë 57- vjeçari. Gjatë rrugës, Saraçi dhe autori dyshohet se kanë pasur një konflikt për motive të dobëta.
Autori i vrasjes e ka goditur me sende të forta në kokë Saraçin, duke bërë që ky i fundit të humbë jetën dhe më pas ka telefonuar familjarët e tij, duke u pohuar se “e kishin vrarë”.
Kanë qenë pikërisht familjarët e autorit, të cilët kanë shkuar në vendngjarje dhe kanë gjetur viktimën.
Ndërsa nuk ka pasur asnjë gjurmë nga autori që gjithashtu është plagosur.
