Deklarata të ashpra për jetën e brendshme të Partisë Demokratike dhe rolin e liderit historik Sali Berisha ka bërë ish-deputeti Ervin Salianji, i pranishëm në studion e Prime News24. Gjatë intervistës, ai foli për sfidat me të cilat përballet opozita dhe nënvizoi se legitimiteti i tij politik buron nga mbështetja e votuesve.
“Aty ku jam sot kam arritur përmes një procesi votimi. Ju fletë për deputetët – le të kujtojmë se në kohën e Bashës, 98 për qind e grupit parlamentar qëndronte me të,” deklaroi Salianji, duke ilustruar kështu ndryshimet e shpeshta të qëndrimeve brenda fraksionit në varësi të asaj se kush drejton partinë.
Të lidhura
None found
Goditja e tij u drejtua hapur drejt Berishës, të cilin e akuzoi se po pengon hapjen demokratike të partisë pa dhënë dot rezultate në kutitë e votimit: “Berisha pretendon se nuk pranon votimin brenda partisë. Përgjigjja duhet t’i kërkohet atij që mban përgjegjësinë. A solli deputetët sipas premtimeve? A arriti sukses në zgjedhjet lokale dhe të përgjithshme? Ndërkohë që aktivistët dilnin në shesh, dy bashkëkryetarët e komisionit të reformës ecnin në turne nëpër Shqipëri.”
Duke e mbyllur qëndrimin e tij, Salianji hodhi një sinjal alarmi për zhvillime të reja politike në rast se gjendja në opozitë nuk transformohet pas ciklit të ardhshëm zgjedhor: “Nëse PD nuk shkon dot te fitorja në zgjedhjet lokale, do të veproj sërish për ta hequr Sali Berishën nga udhëheqja. Për momentin, është më mirë ta ndalojmë grindjen e brendshme dhe të punojmë për të përfshirë edhe forcat e tjera partiake.”
