Ministrat e Brendshëm të Bashkimit Evropian miratuan në një takim në Luksemburg ligjin që u hap rrugë krijimit të qendrave në shtete të treta për personat, kërkesat e të cilëve për azil janë refuzuar.
Të lidhura
None found
Në të ashtuquajturat “Return Hubs” do të dërgohen personat për të cilët është dhënë urdhër largimi nga BE-ja, por që nuk mund të kthehen në vendin e origjinës, për shembull kur ai shtet nuk pranon t’i marrë.
Gjermania, së bashku me Austrinë, Danimarkën, Greqinë dhe Holandën, ka kërkuar prej kohësh zbatimin e kësaj nisme.
Amnesty International ngre shqetësime për qendrat
Ministri Dobrindt bëri të ditur se po zhvillohen bisedime paraprake me disa shtete, por nuk tregoi se cilat janë ato. Në debatet publike si vende të mundshme përmenden shpesh Ruanda, Uganda, Libia dhe Kazakistani.
Krijimi i këtyre qendrave diskutohet prej vitesh dhe mbetet një çështje e debatueshme. Amnesty International paralajmëron se aty mund të shkelen të drejtat e njeriut dhe shpreh kundërshtimin ndaj marrëveshjeve me vende që përballen me konflikte ose paqëndrueshmëri politike.
Rregulla më të rrepta migracioni
Legjislacioni i ri përcakton edhe detyrimin e azilkërkuesve me kërkesa të refuzuara për të bashkëpunuar me procesin e riatdhesimit, nëse duan të shmangin ndalimin.
Nëse nuk bashkëpunojnë, në mbarë BE-në mund t’u ulen ose t’u hiqen përfitimet sociale, si dhe t’u konfiskohen dokumentet e udhëtimit.
Autoritetet e shteteve anëtare mund t’i mbajnë personat në burg deri në dëbim, nëse vlerësojnë se ekziston rrezik arratisjeje ose se ata përbëjnë kërcënim për sigurinë kombëtare. Sipas rregullave të reja, periudha maksimale e burgimit mund të zgjasë deri në 24 muaj dhe, në rrethana të veçanta, të zgjatet edhe me gjashtë muaj.
Rregullat e reja pritet të hyjnë në fuqi gjatë javëve të ardhshme./ DW
